web counter
LEXO PA REKLAMA!

SHKARKO APP

App Store
Google Play

E fundit!

x

Protestë pa protestues në Përrenjas, aktivisti i vetëm në shesh: Kemi ardhur ne t’ju përshëndesim

15 Qershor 2026, 09:29, Aktualitet CNA

Një protestë e paralajmëruar në Përrenjas nuk ka sjellë asnjë pjesëmarrës në shesh. I vetmi person i pranishëm ka qenë aktivisti Eduard Shebeku, i cili jeton në Pogradec, por origjinën e ka nga zona e Përrenjasit. Përballë mungesës së qytetarëve, Shebeku e ka nisur fjalën e tij me tone ironike, duke thënë se banorët nuk kishin dalë në protestë, por se ai kishte ardhur për t’i përshëndetur.

“Mirëmbrëma mirë se keni ardhur! Faktikisht ju s’keni ardhur, por… s’ka problem, kemi ardhur ne. Kemi ardhur t’ju përshëndesim. Thamë që si në të gjithë Shqipërinë të organizonim një protestë dhe këtu në Përrenjas. Unë jam biri i kësaj ane.”

Aktivisti shprehu zhgënjimin për mungesën e pjesëmarrjes, duke thënë se qytetarët e zonës duket se nuk kanë probleme dhe halle për të ngritur.

“Por me sa duket, ju s’paskeni halle dhe probleme fare. Unë kisha bërë mend që t’i thosha ca fjalë veriut, po s’ia them dot se ju qofshi, i keni të gjitha në punë. Megjithatë ne ju falënderojmë shumë që na shikoni edhe nga kafja kështu”, u shpreh Shebeku.

Gjatë deklaratës së tij, ai falënderoi edhe Policinë e Shtetit për praninë në protestë, ndërsa përmendi edhe disa prej figurave të njohura historike të zonës së Përrenjasit, duke kërkuar që të mos harrohet sakrifica e tyre.

“Nëse dikush ju pyet se nga ishte Vilson Blloshmi, apo Genc Leka, apo Petrit Blloshmi, mos i tregoni që ishte nga kjo anë. Sepse ata do të dridhen në varr. Mos i tregoni që ata dhanë jetën për këtë anë”, tha Eduard Shebeku.

Protesta ishte njoftuar më herët si pjesë e tubimeve të zhvilluara edhe në qytete të tjera të vendit, por në Përrenjas ajo u zhvillua pa pjesëmarrje qytetarësh./ CNA





Lajmet e fundit nga