Protestat/ Mesazhi i fortë i Bujar Asqeriut për rininë shqiptare: Mos u trembni, fitorja është me ju

14 Qershor 2026, 10:39, Aktualitet CNA

Protestat/ Mesazhi i fortë i Bujar Asqeriut për rininë shqiptare:

Aktori i madh i skenës shqiptare, Bujar Asqeriu ka ndarë një mesazh të fortë për rininë lidhur me protestat që po zhvillohen prej dy javësh në kryeqytet.

Përmes një videoje, Asqeriu shprehet se është në mbështetje absolute të protestës paqësore dhe kurajoze që po zhvillohet.

Ai shton se ka besim se kjo rini do ta bëjë Shqipërinë më të bukur dhe më të fuqishme.

Ndër të tjera thotë se politika prej disa vitesh po e mbyt vendin dhe se “patronazhistët”, kanë hyrë kudo për të përçarë popullin dhe për ta armiqësuar me njëri-tjetrin.

Aktori bën thirrje që shqiptarët të dalin në mbrojtje të atdheut dhe të mos tremben sepse fitorja është e tyre.

Mesazhi i plotë:

Jam këtu, të dashur miq, të dashur të rinj dhe të reja, në mbështetje absolute të protestës suaj paqësore, të dhimbshme, kurajoze, trimërore.

Migjeni do të thoshte: 'Rini, rini, thuaja këngës më të bukur që di!'

Dhe ju po thurni dhe po këndoni këngën e lirisë. Ju po këndoni këngën e qëndresës. Ju po këndoni këngën e guximit. Ju jeni e ardhmja e këtij vendi. Ju do ta bëni Shqipërinë më të bukur, më të fortë dhe më të fuqishme në Ballkan dhe në Europë. Për këtë, ju përgëzoj dhe ju nderoj pamasë.

Shqipëria, të dashur miq, ndodhet në momente historike. Thonjtë e politikës gati po e shqyejnë dhe po e mbysin prej kaq vitesh. Retorikat e politikanëve shkojnë dhe vijnë pa zgjidhje, pa asnjë të ardhme. Të rinjtë po na largohen. Spiunët, patronazhistët kanë futur hundët kudo për të përçarë këtë popull, për ta armiqësuar me njëri-tjetrin. Kanë futur hashëmin nëpër familje, në shoqëri, kudo.

Jo, zotëri, ne jemi shqiptarë. Ne jemi shqiptarë dhe duhet të dalim siç keni dalë juve në mbrojtje të atdheut tonë. Këtë atdhe që Ismail Beu në 1912 na e la më të madh.

Por tradhtarët e Shqipërisë, që nuk kanë munguar asnjëherë, e kanë shitur, e kanë blerë dhe vazhdojnë ta shesin këtë tokë. Tokën e Arbërit. Gjakun e Skënderbeut, të trimave të Skënderbeut, të trimave shqiptarë.

Prandaj, qëndroni dhe mos u tutni. Mos u trembni, siç keni qëndruar, sepse fitorja është me ju. Ju përqafoj me shumë dashuri të gjithëve. /CNA