Pastrimi i Policisë/ AMP zbulon detajin, kur do të nisë aksioni

11 Nëntor 2023, 11:41, Aktualitet CNA

Gati vetingu në polici. Trupat e Vlerësimit në Agjencinë e Mbikëqyrjes Policore kanë gati dosjet përkatëse në të treja shtyllat e vlerësimit për 9 subjekte ndërsa përgjatë muajit nëntor do të mbahen seancat e hapura edhe për publikun e mediat. Lajmi bëhet i ditur nga Agjencia e Mbikëqyrjes Policore.

Agjencia e Mbikëqyrjes Policore ka sqaruar se pas hedhjes së dy shorteve të para mbi ndarjen e trupave vlerësuese, caktimin e anëtarit zëvendësues dhe anëtarit relator, si edhe shortimin për subjektet e vlerësimit, vijon puna "Për vlerësimin kalimtar dhe periodik të punonjësve të Policisë së Shtetit, Gardës së Republikës dhe Shërbimit për Çështjet e Brendshme dhe Ankesat në Ministrinë e Brendshme”.

Më herët ka qenë edhe Ministri i Brendshëm Taulant Balla i cili ka njoftuar se Policia e Shtetit do të hyjë në një fazë të rëndësishme vetëpastrimi përmes sistemit ku synohet që çdo polic i përfshirë në grupe kriminale apo shkelje të ligjit të largohet nga strukturat policore.

"Vettingu në Polici - AMP nis në nëntor, seancat e hapura për publikun
Agjencia e Mbikëqyrjes Policore vijon me përparësi punën për zhvillimin e procesit të vlerësimit kalimtar të subjekteve të përcaktuar nga ligji nr. 12/2018, "Për vlerësimin kalimtar dhe periodik të punonjësve të Policisë së Shtetit, Gardës së Republikës dhe Shërbimit për Çështjet e Brendshme dhe Ankesat në Ministrinë e Brendshme”, të ndryshuar.

Pas hedhjes së dy shorteve të para mbi ndarjen e trupave vlerësuese, caktimin e anëtarit zëvendësues dhe anëtarit relator, si edhe shortimin për subjektet e vlerësimit, Trupat e Vlerësimit në Agjencinë e Mbikëqyrjes Policore janë drejt përfundimit të dosjeve përkatëse në të treja shtyllat e vlerësimit për 9 subjekte.

Përgjatë muajit nëntor 2023, do të mbahen seancat e hapura në prani të medias dhe publikut.
MB dhe AMP siguron median dhe publikun se procesi i Vetingut vijon në mënyrë të pandërprerë, në zbatim të plotë të afateve të përcaktuara në ligj dhe në përmbushje të pritshmërive të publikut për institucione me integritet të lartë në shërbim të qytetarëve", thuhet në njoftimin e AMP-së./ CNA