web counter
LEXO PA REKLAMA!

SHKARKO APP

App Store
Google Play

35-vjetori i themelimit të PS-së/ Rama, urim për socialistët

12 Qershor 2026, 08:13, Aktualitet CNA

35-vjetori i themelimit të PS-së/ Rama, urim për socialistët

Kryeministri Edi Rama ka uruar anëtarët dhe mbështetësit e Partisë Socialiste të Shqipërisë me rastin e 35-vjetorit të themelimit të saj, duke theksuar rëndësinë e misionit për integrimin europian të vendit.

Në një mesazh të publikuar në rrjetet sociale, Rama shprehu urimet e tij për socialistët, ndërsa nënvizoi objektivin për ta bërë Shqipërinë pjesë të Bashkimit Europian deri në vitin 2030.

“Mirëmëngjes dhe me urimin për çdo anëtar e anëtare të familjes sonë të madhe politike, në këtë 35-vjetor të Partisë Socialiste, si edhe me bindjen e patundur në misionin tonë historik për të ngjitur Shqipërinë 2030 në majën e Europës së Bashkuar, ju dëshiroj të gjithëve një ditë të mbarë”, shkroi Rama.

Kryeministri e cilësoi integrimin europian si një mision historik dhe ritheksoi angazhimin e Partisë Socialiste për të vijuar reformat dhe proceset që lidhen me anëtarësimin e vendit në Bashkimin Europian. Mesazhi i tij vjen në ditën kur Partia Socialiste shënon 35 vjet nga krijimi i saj.

Për të shënuar këtë përvjetor, kreu i PS-së ka ndërmarrë një tur disaditor në të gjithë Shqipërinë, duke zhvilluar takime me strukturat dhe mbështetësit socialistë në çdo qark. Ky tur përmbyllet këtë të premte me një aktivitet në kryeqytet, i cili shënon edhe kulmin e festimeve për 35-vjetorin.

Partia Socialiste e Shqipërisë u themelua më 12 qershor 1991, si pasardhëse e Partisë së Punës së Shqipërisë, pas rënies së regjimit komunist dhe vendosjes së pluralizmit politik. Në Kongresin e saj të parë, ajo u transformua zyrtarisht në një forcë politike të spektrit të majtë, duke adaptuar vlerat socialdemokrate. Gjatë tri dekadave e gjysmë të ekzistencës së saj, PS ka qenë një prej aktorëve kryesorë në jetën politike shqiptare, duke qeverisur vendin në disa mandate të ndryshme dhe duke luajtur rol kyç në proceset e demokratizimit dhe integrimit euroatlantik të Shqipërisë./ CNA





Lajmet e fundit nga