E fundit!

11:41 Aktualitet

Përplasjet me opozitën/ Balla: Partinë e Sali Berishës nuk e pranoj si përfaqësuese të protestës

Kreu i grupit të PS, Taulant Balla pas mbledhjes së Konfer...

Rritet numri i vrasjes së gazetarëve/ Reporterët pa Kufinj publikojnë shifrat e frikshme

17 Dhjetor 2019, 10:44, Kosova & Bota CNA

Reporterët pa Kufij (RSF) kanë botuar raportin vjetor për 2019, mbi abuzimet ndaj gazetarëve nëpër botë. Gjatë këtij viti, 49 gazetarë janë vranë, 389 janë aktualisht në paraburgim dhe 57 janë marrë peng. Edhe pse gazetaria mbetet një punë e rrezikshme, numri i të vdekurve nuk ka qenë kurrë më i ulët në 16 vjetet e fundit, gjë që dëshmon se vrasjet e gazetarëve janë në rënie, mirëpo vetëm në shtetet që janë në konflikt.

Mbulimi i konflikteve në Siri, Jemen dhe Afganistan ka qenë shkak për rënien në numër të vrasjeve tragjike. 17 gazetarë u vranë në të tre këto vende në vitin 2019, në krahasim me 34 që u vranë vitin e kaluar.

Ajo çfarë përbën shqetësim është se numri i gazetarëve të vrarë në vendet e ashtuquajtura “në paqe” mbetet i lartë nga një vit në tjetrin. Amerika Latine, me gjithsej 14 të vrarë në të gjithë kontinentin, është bërë një zonë vdekjeprurëse për gazetarët. Vetëm në Meksikë janë vrarë 10 gazetarë. Tani ka proporcionalisht më shumë vdekje në vendet në paqe (59%) sesa në zonat e konfliktit dhe një rritje në 2% e numrit të gazetarëve të vrarë me synim dhe vetëdije.

“Për gazetarët, kufiri midis vendeve në luftë dhe në paqe po zhduket. Ndërsa ne duhet të jemi të kënaqur me rënien në numrër të gazetarëve të vrarë në zonat e konfliktit, gjithashtu vërejmë se gjithnjë e më shumë gazetarë janë vrarë me qëllim për punën e tyre në vendet demokratike, gjë që përbën një sfidë të vërtetë, për demokracitë nga të cilat kanë ardhur këta gazetarë ” u shpreh sekretari i përgjithshëm i RSF, Christophe Deloire.

Një fakt tjetër shqetësues i zbuluar nga rezultatet e Reporterët pa Kufij, është që numri i gazetarëve të arrestuar në të gjithë botën vazhdon të rritet. Në fund të vitit 2019, 389 gazetarë u burgosën për ushtrimin e funksioneve të tyre , 12% më shumë se vitin e kaluar. Pothuajse gjysma e gazetarëve të burgosur janë arrestuar në Kinë, Egjipt dhe Arabi Saudite./Përshtati nga rsf.org, CNA.al