Raporti i KLSH/ Drejtoria e Burgjeve, 1.7 miliardë lekë dëm buxhetit të shtetit

6 Qershor 2016, 14:46, Aktualitet CNA

Kontrolli i Lartë i Shtetit ka konstatuar një sërë shkeljesh nga Drejtoria e Përgjithshme e Burgjeve, e cila drejtohet nga Artur Zoto. Sipas auditimit të kryer nga KLSH për periudhën Janar-Prill 2016, rezulton se Drejtoria e Burgjeve i ka shkaktuar buxhetit të shtetit një dëm rreth 1.7 miliardë lekë të vjetra.

Shkeljet janë kryer në disa sektore, nga tatim-taksat, pagat dhe siguracionet, procedurat e prokurimit publik, zbatimit të punimeve, si dhe në fushën e shpenzimeve operative.

Tatim ? Taksa

Nga auditi i KLSH rezulton se Drejtoria e Përgjithshme e Burgjeve i ka shkaktuar një dëm buxhetit të shtetit në vlerën 1,049,000 lekë të vjetra si pasojë e mos ndaljes dhe mos derdhjes për llogari të Drejtorisë Rajonale të Tatim Taksave tatimin mbi të ardhurat për zbatimin e vendimeve të gjykatës në lidhje me pagesat e personelit deri në kthimin e punonjësve në vendin e punës.

Pagat, shpërblimet dhe siguracionet shoqërore

Drejtoria e Përgjithshme e Burgjeve, i ka shkaktuar një dëm buxhetit të shtetit në vlerën 4,127,000 lekë të reja. Sipas KLSH-së, kjo ka ardhur si pasojë e mos ndaljes dhe mos derdhjes për llogari të Drejtorisë Rajonale të Sigurimeve Shoqërore të kontributit të sigurimeve shoqërore e shëndetësore në vlerën 1,601,000 lekë të reja gjatë zbatimit të vendimeve të gjykatës për pagesën e personelit deri në kthimin e punonjësve në vendin e punës dhe në vlerën 2,526, 000 lekë të reja si pasojë e mos derdhjes në fondin e ISSH detyrimet e punëdhënësit ndaj punëmarrësit për efekt të zbatimit të 4 vendimeve të gjykatave nga DP Burgjeve.

Procedurat e prokurimit

Ky është sektori me dëmin më të vogël që Drejtoria e Përgjithshme e Burgjeve i ka shkaktuar buxhetit të shtetit. Sipas auditit të KLSH-së, rezulton se në këtë sektor Drejtoria e Burgjeve i ka shkaktuar shtetit një dëm me vlerë prej 32,000 lekë të reja.

Zbatimi i Punimeve

Auditi i KLSH-së ka nxjerrë në pah shkelje edhe në procedurat e zbatimit të punimeve. Sipas KLSH-së, Drejtoria e Burgjeve i ka shkaktuar një dëm buxhetit të shtetit me vlerë 4,610,000 lekë të reja.

Shpenëzimet operative

Ky është sektori më i keq i Drejtorisë të Përgjithshme të Burgjeve. Auditi i KLSH-së ka zbuluar një sërë shkelje të këtij institucioni për sa i përket shpenzimeve operative. Sipas KLSH-së, në këtë sektor, Drejtoria e Burgjeve i ka shkaktuar buxhetit të shtetit një dëm me vlerë 168,000,000 lekë të reja (1.68 miliardë lekë të vjetra).