Janar, doganat 3.7% më pak të ardhura

6 Mars 2015, 08:55, Aktualitet CNA

Ministria e Financave ka sqaruar se, e priste më pak të ardhura në buxhet për muajin janar për shkak të instalimit të një sistemi të ri IT në Drejtorinë Përgjithshme të Tatimeve, por të ardhurat kanë shënuar rënie në raport me janarin e vitit 2014 edhe nga administrata doganore. Të ardhurat nga tatimet dhe doganat në muajin janar shënuan rënie me , 5.4 për qind në krahasim me janarin e vitit 2014 ose në vlera neto 946 milionë lekë më pak , madje vlera e tyre ka qenë edhe më e ulët se, e janarit 2013.

Doganat arkëtuan 342 milionë lekë ose 3.7% më pak se, janari i vitit që shkoi.

Burimet zyrtare të Ministrisë së Financave pohuan se, faktorët që kanë ndikuar në përformancën e të ardhurave doganore për muajin janar 2015 janë rënia e të ardhurave nga renta minerare për shkak të rënies së eksporteve të naftës bruto dhe si pasojë e rënies së çmimit në bursë. Ministria e Financave rendit si arsye të dytë rënien e importit të karburanteve për shkak rritjes se, prodhimit vendas dhe rënies së çmimit të importit: Gjithashtu financat pranojnë se, ka rënie të sasive të importit te karburanteve dhe cigareve për shkak të krijimit të rezervave në muajt e fundit të vitit 2014 për shkak të ndryshimit të nivelit të taksimit.

Ministria e Financave planifikoi të grumbullonte në janar 2015 nga tatimet 1 miliardë lekë më pak se, fakti 2014, ndërsa nga doganat 712 mln lekë më pak.

Në marrëveshjen e rishikuar me FMN qeveria ka shprehur pakënaqësi për koncesionarin e doganave, Crown Agent se, nuk po evidenton rastet serioze të kontrabandës, ndërkohë që në këmbim të këtij konsultimi po paguan 8 milionë euro.

Rënia në vlerë neto e të ardhurave krahasuar me një vit më parë shihet shqetësuese nga ekspertët e ekonomisë, duke marrë në konsideratë se, qeveria raporton rritje ekonomike dhe barra fiskale është rritur edhe për 2015.

Rënien më të madhe në arkëtimet e doganave në krahasim me janarin e vitit që shkoi e kanë pësuar të ardhurat nga TVSH. Në janar të vitit 2015, arkëtimet e TVSH në doganë ranë me 11 për qind në krahasim janarin e vitit 2014.

Në të ardhurat tatimore rënien më të madhe e kanë shënuar të ardhurat nga tatim fitimi, ku janë mbledhur 60% më pak se e njëjta periudhë e një viti më pare. Negative edhe rezultojnë TAP, taksat nacionale, të ardhurat jotatimore dhe të ardhurat vendore. Ministria e Financave ka pohuar se, përfshirja në zbatim e shumë ligjeve të reja dhe sistemi online kanë ndikuar negativisht, situatë që pritet të kompensohet në muajt në vijim.

monitor.al