E fundit!

10:17 Aktualitet

Zbardhen të tjera detaje/ Gjenden 3 armë në stanin ku fshihej Braçellari

Hetimet për ngjarjen e rëndë në Lozhan, ku si pasojë e shk...

Skënderbeu huazon një futbollist te Tomori, në Korçë presin edhe dy afrime

11 Gusht 2023, 15:31, Sport CNA

Skënderbeu huazon një futbollist te Tomori, në Korçë

Skënderbeu vijon ende të jetë aktiv në merkato duke mbyllur të tjera akorde përsa i përket lëvizjeve në këtë hapësirë transferimesh. Këtë herë bardhekuqtë po punojnë me kujdes në dalje për të zbrazur ekipin, i cili ka mbingarkesë elementësh në këtë moment.

Në të tilla kushte i pari që ndërron ambient është Kevin Hysolli. Korçari i linjës së majtë i ka pasur hapësirat e limituara nga ana e trajnerit Ivan Gvozdenoviç, gjë që u pa edhe në këtë fazë përgatitore. Hysolli tashmë do të vijojë karrierën te Tomori i Beratit, atje ku do të jetë i huazuar për një sezon nga bardhekuqtë. Hysolli pritet që të ketë hapësira më të shumta dhe të fitojë eksperiencë, që do ta ndihmojë për t’u rritur më shumë. Normalisht është një huazim i thjeshtë ky i bardhekuqve pasi drejtuesit korçarë besojnë te cilësitë e Hysollit dhe nuk duan të rrezikojnë që ta humbin përfundimisht.

Kujtojmë se ka qenë trajneri Migen Memelli ai që i dha mundësinë Hysollit të debutojë me fanellën bardhekuqe në sezonin e kaluar, atje ku lojtari ka bërë paraqitje të mira. Veç Hysollit në listën e transferimeve janë edhe lojtarë të tjerë, kryesisht të rinj. Pikërisht për këta lojtarë që nuk kanë shumë hapësira në Korçë, do të shihet mundësia të vijojnë sezonin në Pogradec, Maliq apo Burrel, ekipe të cilat prej kohësh janë në bisedime me Skënderbeun.

AFRIMET- Edhe pse do dy javë të nisë kampionati dhe bardhekuqtë kanë mbyllur përgatitjet, duket se merkatoja do të vijojë të jetë ende e hapur edhe në hyrje. Burime të sigurta në klub bëjnë me dije se Skënderbeu është në kërkim të një sulmuesi dhe një mbrojtësi qendror. Për momentin nuk dihen se cilët janë emrat e lojtarëve që korçarët po ndjekin apo janë në bisedime, por mësohet se një prej tyre minimalisht ose maksimalisht të dy do të bashkohen me ekipin deri në mbyllje të hapësirës së transferimeve. Janë pikërisht këto dy pozicione ku trajneri Gvozdenoviç ka kërkuar dublim të çdo lojtari, çka ka rifutur korçarët në merkato.