Juventus bind në start, fitore me shkëlqim ndaj Parmës. “Ngec” Atalanta

24 Gusht 2025, 23:09, Sport CNA

Juventus bind në start, fitore me shkëlqim ndaj Parmës.

Juventusi e ka nisur në mënyrën më të mirë të mundshme sezonin e ri, pasi mposhti Parmën me rezultatin 2-0. Start i mbarë për skuadrën e Igor Tudor, i cili synon të çojë ekipin drejt objektivave madhorë dhe për të reduktuar diferencën me kampionët në fuqi të Napolit.

Në pjesën e parë, Juventusi dominoi në zotërimin e topit dhe kontrolloi ritmin e lojës, por vështirësitë në finalizim nuk lejuan që epërsia të kthehej në gol. Rastet e pakta për gol në 45 minutat e para nuk ndryshuan rezultatin, me portierin e Parmës, Suzuki, që u vu në provë vetëm nga një goditje me kokë e Kosensaos.

Pjesa e dytë solli më shumë intensitet. Parma pati një rast të mirë me Mateo Pelegrinon, por tentativa e tij u bllokua nga Bremer. Juventus reagoi me gjuajtje nga distanca dhe një goditje të Konsensaos që u devijua në shtyllë. Presioni u shpërblye në minutën e 59-të, kur Kenan Jildiz shërbeu një top në zonë dhe Xhonatan David shënoi golin e tij të parë me fanellën bardhezi.

Edhe pse Andrea Kambiaso u ndëshkua me karton të kuq, rrjedha e lojës nuk ndryshoi. Në minutat e fundit, Vlahovi? realizoi golin e dytë pas një tjetër asistimi nga Jildiz, duke vulosur fitoren 2-0. Ky rezultat i dha Juventusit tre pikët e para dhe një nisje pozitive në kampionat, ndërsa për Parmën ishte një fillim me humbje në ndeshjen e parë nën drejtimin e trajnerit Karlos Kuesta.

Një sfidë tjetër e rëndësishme e javës së parë u luajt në Bergamo, ku Atalanta barazoi 1-1 me Pizën.

Ndeshja nisi me tentativat e Atalantës për të ndërtuar aksione nga krahët, por pa efikasitet në zonën e rreptësisë. Piza, që rikthehej në elitë pas 34 vitesh, shënoi e para në minutën e 26-të, kur një top i krosuar në zonë solli një autogol të Isak Hien. Miqtë patën mundësi për të dyfishuar, por portieri Karneseki reagoi mirë ndaj goditjes me kokë të Moreos.

Atalanta barazoi rezultatin në minutën e 50-të, me Skamakën që gjeti rrugën e rrjetës pas një pasimi nga Pashaliç. Sulmuesi italian pati edhe dy mundësi të tjera të mira, përfshirë një top të ndalur nga shtylla dhe një tjetër të pritur nga portieri Semper. Pavarësisht rasteve të shumta, Atalanta nuk arriti të marrë tre pikët, duke u detyruar të mjaftohej me barazimin. Ky ishte sezoni i parë pas tetë vitesh që skuadra bergamaske nuk arrin të fitojë në javën hapëse të Serisë A. Për Pizën, barazimi sjell një pikë të vlefshme në rikthimin e tyre në elitë, ndonëse mbeten ende pa fitore ndaj Atalantës që prej vitit 1985.