Interpelanca për projektin e Zvërnecit/ Jaupaj: Do t’i nënshtrohet një analize të thelluar për ndikimin në mjedis

11 Qershor 2026, 14:11, Politikë CNA

Interpelanca për projektin e Zvërnecit/ Jaupaj: Do t’i

Në seancën e sotme plenare është zhvilluar interpelanca me ministrin e Mjedisit, Sofjan Jaupajn, për investimin në Zvërnec, kërkuar nga opozita.

Deputetja e PD-së, Ina Zhupa, gjatë fjalës së saj i drejtoi disa pyetje ministrit lidhur me projektin që është planifikuar të bëhet.

“A bini ju dakord me faktin se mund të jetë pronë private brenda zonës së mbrojtur dhe mund të trajtohet si parcelë ndërtimi e zakonshme, apo statusi mjedisor përcakton vlerën ekologjike dhe jo pronësinë mbi tokën? A jeni ju ai që i jeni përgjigjur Komisionit Europian se e keni pezulluar projektin dhe a kishte një projekt? Sepse jeni i njëjti individ që keni thënë se nuk ka projekt, ndërkohë që përmenden shifra konkrete. Ka dokumente që tregojnë se 4 leje janë dhënë për atë projekt.

Sqaroni, a ka leje zhvillimi, a ka leje ndërtimi, a ka projekt apo nuk ka? Si është dhënë miratimi apo dakordësia për leje zhvillimi pa vlerësim të ndikimit në mjedis? Ndërkohë që detyrimi është që ky proces të ndodhë para se të jepet leja e zhvillimit. A mund të miratohen rrethime, rrugë aksesi dhe ndërhyrje të tjera pa u vlerësuar ndikimi mbi dunat, pyllin bregdetar dhe korridoret ekologjike?”, tha Zhupa.

Në përgjigje, Jaupaj u shpreh se nuk duhet të vihet në dyshim angazhimi i qeverisë për mbrojtjen e natyrës, pasi, sipas tij, ka fakte dhe ligje që e provojnë këtë. Më tej shtoi se projekti i Zvërnecit do t’i nënshtrohet një analize të thelluar për ndikimin në mjedis. Ndër të tjera, u shpreh se legjislacioni shqiptar nuk vendos ndalime, por kushte se si duhet të realizohen.

“Askush s’mund të vërë në dyshim angazhimin tonë për natyrën, sepse është i matshëm. Është debat i shëndetshëm dhe i nevojshëm, por duhet të mbështetemi te faktet, ligjet dhe shkenca.

Së pari, janë ngritur pretendime se procedura mjedisore është anashkaluar. Faktet tregojnë se, pas shqyrtimit të dokumentacionit, u vendos që duhet t’i nënshtrohet procedurës së thelluar të ndikimit në mjedis, pra është aktivizuar niveli më i lartë i legjislacionit. Projekti do t’i nënshtrohet një analize të plotë. Me fjalë të tjera, shteti shqiptar ka vendosur që vendimmarrja mjedisore të vendoset mbi evidencën shkencore. Është pikërisht garancia që mbrojtja e natyrës duhet të bazohet mbi fakte, studime dhe vlerësime profesionale.

Statusi i zonës së mbrojtur. Zona e Pishë-Poros është shpallur zonë e mbrojtur, kategoria V, që nuk është rezervë strikte natyrore. Filozofia bazohet mbi bashkëjetesën e natyrës dhe aktivitetit ekonomik e social. Mbi zonat e mbrojtura mund të ekzistojnë qendra banimi etj. Ligji shqiptar nuk vendos ndalime, por kushte se si duhet të realizohen.

BE kërkon respektimin e direktivës së habitateve dhe shpendëve. Projekti të zhvillohet në bazë të ndikimit konkret që mund të ketë. Nenet kërkojnë vlerësim të përshtatshëm të ndikimit dhe jo ndalim automatik”, tha Jaupaj. /CNA