“Menduam se do t’ia hidhte sëmundjes”, Ndriçim Xhepa kujton Mirush Kabashin

2023-12-05 11:48:00, Aktualitet CNA

“Menduam se do t’ia hidhte sëmundjes”, Ndriçim

Ndriçim Xhepa

Aktori Ndriçim Xhepa ka kujtuar dhe vlerësuar figurën e Mirush Kabashit.

Në një dalje mediatike, Xhepa u kthye pas në kohë, kur luajti për herë të parë me Kabashin në filmin ‘Kohë e largët’, ndërsa theksoi se ky i fundit ishte maniak i përpikërisë.

“Lajm i trishtë në këtë mëngjes dhjetori. Është lajm i trishtë për bashkëshorten, për dy vajzat e tij dhe komunitetin e teatrit të Durrësit, ku punoi për shumë vite. Ka pasur edhe prezencë në televizionin shqiptar, në spektakle të fundvitit dhe më pas erdhi në teatrin Kombëtar pas viteve 2000. Ka bashkëpunuar me të gjithë kolegët. Ishte prezent në shumë institucione dhe për spektatorin dhe artdashësit që prekën artin e tij. Mirushin, e kam takuar shtatorin që kaloi. E pashë mirë nga ana psiko-fizike, pasi kishte disa kohë që vuante nga kjo sëmundje e rëndë. Ishte natyrë vitale, sikur nuk e ndjeje fare që ai kalonte një situate të tillë. Ndejmë dhe biseduam dhe menduam se do t’ia kalonte. Por ja që s’paska qenë e thënë. Pasi ai ishte notar, sportist, nuk përdorte alkool dhe as cigare, por nuk qenka e shkruar. Ishte një aktor punëtor, maniak dhe me ekzigjenca të mëdha. Ne jemi bashkuar në javët e fundit të filmit ‘Kohë e largët’, ishim në ishullin e Prespës dhe punuam vetëm bashkë dhe vura re një maniakëri.”, tha Xhepa.

Mirush Kabashi, mjeshtri i skenës së teatrit dhe jo vetëm, u shua këtë të martë duke lënë një plagë në zemrat e familjarëve dhe shqiptarëve.

Aktori i mirënjohur, i cili mban edhe titullin “Artist i merituar”, do të mbahet mend për kontributin e paçmuar në filmografinë shqiptare.

Mirush Kabashi la gjurmë me rolet e tij në teatër dhe në filmat shqiptarë, ku numërohen rreth 100 të tilla.

Aktori me origjinë nga Gjakova është lindur në Shkodër dhe është rritur në Durrës.

Ai ka qenë drejtor në teatrin “Aleksandër Moisiu” të Durrësit. Më pas ka punuar edhe në Televizionin Shqiptar, si dhe ka qenë pedagog i “Mjeshtrisë së Aktorit” pranë Akademisë së Arteve./CNA