Të huajt kanë blerë 207 milionë euro borxh publik shqiptar, rritje 39% në 2025

6 Maj 2026, 15:08, Ekonomi CNA

Të huajt kanë blerë 207 milionë euro borxh publik shqiptar,

Portofoli i instrumenteve të borxhit të qeverisë i zotëruar nga investitorët e jashtëm arriti në 20 miliardë lekë ose rreth 207 milionë euro në fund të vitit të kaluar.

Sipas të dhënave nga Banka e Shqipërisë, vlera e investimit të subjekteve jorezidente në letrat e borxhit sovran të vendit u zgjerua me 39% gjatë vitit 2025.

Megjithatë, rritja ishte e përqendruar kryesisht në gjysmën e parë të vitit, ndërsa u frenua në gjashtëmujorin e dytë, e ndikuar ndoshta nga ulja e ndjeshme e yield-eve të titujve qeveritarë.

Investitorët nga jashtë vendit mbajnë aktualisht rreth 2% të stokut të borxhit të brendshëm të qeverisë shqiptare. Megjithëse pesha e tyre ngelet ende modeste, investitorët nga jashtë kanë ndikuar në rritjen e kërkesës dhe uljen e yield-eve në tregun e instrumenteve të borxhit të qeverisë, sidomos pas vitit 2024.

Yield-i mesatar i borxhit të brendshëm publik pësoi rënie gjatë 2025, pas tri vitesh radhazi në rritje. Sipas të dhënave nga Ministria e Financave, yield-i mesatar për të gjitha letrat me vlerë të borxhit të emetuara në tregun e brendshëm në fund të vitit 2025 ra në 4.23%, nga 4.56% që kishte qenë në fund të vitit 2024.

Duke përjashtuar portofolin e bonove të financuar nga Banka e Shqipërisë, yield-i mesatar ka arritur në 4.35%, nga 4.65% që kishte qenë në fund të vitit të kaluar.

Yield-i mesatar i borxhit të brendshëm ka arritur nivelin më të ulët të katër viteve të fundit.

Pjesëmarrja e investitorëve të huaj në tregun e instrumenteve të borxhit në lekë të qeverisë shqiptare nisi në vitin 2024, me fokus kryesisht investimin në obligacione.

Megjithëse profili i investitorëve është i mbrojtur nga rregullat e konfidencialitetit, sipas burimeve nga tregu bëhet fjalë kryesisht për investitorë institucionalë, që kanë vendosur për herë të parë të përfshijnë edhe obligacionet në lekë të qeverisë shqiptare në portofolet e tyre.

Hyrja e këtyre investitorëve në tregun e titujve qeveritarë në lekë është ndikuar edhe nga përmirësimi i vlerësimit të borxhit sovran dhe ulja e borxhit publik të vendit.

Të dhënat e Ministrisë së Financave treguan se në fund të 2025 borxhi publik zbriti në nivelin e 52.9% të PBB-së, ndërsa të dhënat paraprake të tremujorit të parë tregojnë një rënie të mëtejshme në nivelin 48.8%.

Rënia e shpejtë e borxhit publik në vitet e fundit është ndikuar në një masë të madhe nga forcimi i lekut në kursin e këmbimit valutor, por pjesërisht edhe nga një politikë fiskale më e shtrënguar, me deficite buxhetore në rënie./Monitor