E fundit!

21:42 Kronika

Konflikt mes vëllezërve në Kavajë/ Ndërron jetë 74-vjeçari, u godit me thikë

Një ngjarje tragjike ka ndodhur mbrëmjen e sotme në fshati...

Si u vodh Thesari i Shtetit në tunelin sekret në Krrabë

13 Shkurt 2024, 10:46, Aktualitet CNA

Grabitja e Thesarit të Shtetit në Krrabë ka ndodhur gjatë muajve mars dhe prill 1997, kur Shqipëria u zhyt në kaos dhe anarki me mijëra viktima dhe dëme të jashtëzakonshme.

Por vjedhja u zbulua vetëm tri vite më pas.

Pesë persona u dënuan me dënime të shkurtra për vjedhjen. Pjesa e mbetur e arit u transportua në Tiranë.

Gjatë procesit drejtuesi i grupit për sigurinë e Thesarit të Shtetit, Arjan Bishqemi, ka deklaruar se ka bërë kontroll në Thesar në datën 24 prill 1997, pra më shumë se një muaj pas sulmeve.

Por çuditërisht ai nuk kishte kërkuar që të bëhej inventar fizik dhe të shikohej nëse Thesari ishte prekur apo jo, ndaj vjedhja nuk u konstatua zyrtarisht.

Inventari që zbuloi se në Tunelin e Krrabës mungonin rreth 280 kg flori, u bë në datën 7 prill të vitit 2000, pra rreth 3 vjet pas sulmeve në tunel.

Po çfarë ishte grabitur saktësisht në tunelin sekret të Thesarit të Shtetit në Krrabë?

Inventari i vitit 2000, konstatoi se nga 24 arkat metalike në të cilat ishte vendosur ari në gjendje monedhe lira turke, napolona francezë dhe dollarë të artë amerikanë, 11 arka ishin krejtesisht të zbrazura.

Ndërsa nga 97 arkat e mbushura secila me nga 20 kilogram argjend, ishin hapur vetëm 2 arka, por nuk ishte grabitur asnjë gram argjend.

Nga 24.000 napolona ari në total, grabitësit kishin marrë rreth 4.000 napolona.

Dëmin më të madh e pësuan lirat turke, ku nga 62 mijë të tilla, grabitësit morën rreth 40 mijë.

Kurse nga 1600 dollarët amerikanë prej ari që ndodheshin në thesarin e shtetit, u grabitën 10 prej tyre.

Çështja u rihap në 2008 pas kapjes së një sasie ari me vlerë 2.7 milionë euro.

U konstatua se kjo sasi e madhe ari ishte pjesë e sasisë së vjedhur në Krrabë.

Të dënuarit zyrtarë për këtë supervjedhje janë: Arian Bishqemi, drejtuesi i grupit për sigurinë e Thesarit: 7 vjet (ka mbaruar dënimin), Blerim Haka, roje i objektit: 3 vjet (ka mbaruar dënimin), Pellumb Dalti: 6 vjet (ka mbaruar dënimin), Enver Hyka: 8 vjet (ka mbaruar dënimin), Ahmet Hyka: 4 vjet (ka mbaruar dënimin), Genci Lamçe (i dënuar në 2008), Astrit Lamçe (i dënuar në 2008).

Në nëntor të viit të kaluar, Gjykata e Posaçme urdhëroi SPAK-un të hetojë pasuritë e ish-Presidentit Sali Berisha dhe ish-Kryeministrit Ilir Meta. Vendimi mori shkas nga refuzimi i një kallëzimi në SPAK që lidhet me grabitjen e këtij Thesari.

Gjatë viteve ka pasur herë pas here akuza politike veçanërisht nga Berisha për Metën dhe anasjelltas si organizatorë dhe përfitues nga kjo vjedhje e rëndë.

“Në qoftë se dikush mendon t’u vjedhë shqiptarëve floririn dhe të lajë duart si ponc Pilati, gabon shumë rëndë, ka bërë llogari shumë të gabuara. Kërkoj me insistim dorëheqjen e Ilir Metës”, – pati deklaruar në 2000 Sali Berisha.

“Ai tjetri në fund nuk quhet Ilir Meta, por Ilir Floriri”, – deklaroi Berisha në një debat më pas në Parlament.

Vetë Ilir Meta në një intervistë disa vite më vonë, mohon akuzat.

Por ai e pranon se ishte opozita që e shtyu të bënte verifikime zyrtare për gjendjen në Thesar.

“Pas insistimit të opozitës se Thesari i Shtetit është prekur, është cenuar, në atë kohë unë si Kryeministër u kam kërkuar autoriteteve përgjegjëse, Ministrisë së Rendit Publik, për të bërë një verifikim të gjendjes në të cilën ndodhej thesari i shtetit. Përgjigjja e grupit që ka bërë verifikimin, ka qenë se nuk ka pasur asnjë cenim të thesarit të shtetit, por në fakt në mos gaboj nuk kishin bërë inventarin fizik, por vetëm vëzhgimin e godinës nga jashtë. Pas verifikimit fizik u verifikua që një pjesë e konsiderueshme e monedhave ishin grabitur. Më pas u bënë edhe hetimet përkatëse dhe u verifikua edhe mënyra edhe vendi se nga ishte bërë një grabitje e tillë”, – pati deklaruar Ilir Meta.

Nga ana tjetër, Ilir Meta, nisi kundërakuzat për Berishën, duke e akuzuar se ai kishte dijeni, kur askush nuk e dinte, pikërisht sepse ishte vetë hajduti.

“Edhe sot, unë nuk e kuptoj se nga e dinte Berisha që thesari i shtetit ishte vjedhur apo ishte cenuar”, – pati deklaruar Ilir Meta./DITA