web counter
LEXO PA REKLAMA!

SHKARKO APP

App Store
Google Play

Ambasadori i Indisë, takim në Universitetin e Shkodrës: Marrëdhëniet tona nisin me Nënë Terezën

4 Dhjetor 2025, 14:36, Aktualitet CNA

Ambasadori i Indisë, takim në Universitetin e Shkodrës:

Rektori i Universitetit të Shkodrës, Tonin Gjuraj, priti në një takim Ambasadorin e Indisë në Shqipëri, Ravindra Prasad Jaiswal. Dy programe të reja synojnë të marrin mbështetjen e shtetit indian në vendin tonë. Rektori tha se ka kërkesa të larta nga të rinjtë indianë që punojnë në vendin tonë për të studiuar, dhe programi do të jetë në gjuhën angleze.

"?E informova ambasadorin se duke nisur nga viti i ardhshëm ne do të kemi një program në administrim biznesi. Ne marrim çdo ditë mesazhe nga të rinjtë indianë se duan të ndjekin këtu studimet. Ky program do të jetë në gjuhën angleze. Ambasadori na tha se do të na ndihmojë në një tjetër program studimi, në menaxhimin shëndetësor. Vetë ambasada, ndonëse është e re, do të shohë mundësinë e ekspertizës mësimore përmes shtetit indian", u shpreh rektori Tonin Gjuraj.

Ambasadori indian, teksa foli për marrëdhëniet dypalëshe, u ndal te shembulli i Nënë Terezës.

"?Jemi të gëzuar të jemi këtu. Siç e dini, India dhe Shqipëria kanë histori të gjatë, kemi kontakte të gjata. Nënë Tereza ka lindur këtu me prindër shqiptarë, por ajo zgjodhi Indinë për të ndihmuar të varfrit. Atë e donin shumë jo vetëm në Indi, por në të gjithë botën. Ne duam të përmirësojmë dhe të krijojmë marrëdhënie të reja. Duam të kemi marrëdhënie sa më të mira për të investuar edhe në Universitetin e Shkodrës, që të shohim se si do të bashkëpunojmë", tha ambasadori Indian, Ravindra Prasad Jaiswal.

Gjatë takimit, palët diskutuan mbi mundësitë e zgjerimit të bashkëpunimit akademik dhe kulturor mes Universitetit të Shkodrës dhe institucioneve të arsimit të lartë në Indi. Për Universitetin e Shkodrës, kjo vizitë vjen si një hap i rëndësishëm drejt krijimit të partneriteteve të reja ndërkombëtare dhe rritjes së profilit akademik. /CNA





Lajmet e fundit nga