"Rojet e Bashkisë goditën lojtarët", trajneri i Erzenit flet për tensionin në sfidën me Burrelin

23 Mars 2021, 11:54, Sport CNA

Erzeni doli i mposhtur nga kjo pasi u mposht nga Burreli me rezultatin 1-0. Mirëpo, goli i matjanëve solli shumë polemika për shkak se trajneri i shijakasve, Dorian Bubeqi, pretendoi për një pozicion jashtë loje, ndërsa protestoi te anësori dhe më pas situata u tensionua. Tension që në fakt Bubeqi i ftuar në emisionin ?E Hëna Sportive?, e justifikoi prej ndërhyrjes së rojeve të Bashkisë pasi ata goditën futbollistët e tij.

?Më vjen keq, sepse nëse do mundeshim ndërshmërisht, do isha i kënaqur dhe do shkoja në stërvitje ti kërkoja llogari ekipit, nuk kam çfarë të them më shumë. Ishte një pjesë e parë korrekte përsa i përket gjykimit. Në pjesën e dytë, nëse nuk kishte pozicion jashtë loje në momentin e shënimit të golit, atëherë unë i kërkoj falje. Por nëse ishte, atëherë arbitri duhet të mbajë përgjegjësi. Na pamjet, them që është 100% pozicion jashtë loje?.

?Përveç pikëve që kemi humbur në këtë ndeshje, na rrezikohet dhe vendi i katërt, sepse kemi bërë dhe ne llogaritë tona. Pikët që nuk kemi marrë fazën e parë, jemi munduar ti rikuperojmë në këtë fazë. Besoj se kemi arritur diçka, por përveç pikës, mendoj se ana morale e skuadrës është shumë më e lartë. Të mundësh Erzenin, duhen bërë shumë gjëra të tjera?.

?Momenti i tensionit? Janë moment që ekzagjerohen nga rojet e Bashkisë, sepse nuk mund të them stjuartë. Ne shkuam thjesht për të protestuar, pa ofenduar arbitrin. Ardhja e rojeve të Bashkisë, duke goditur lojtarët e mi, duke më tërhequr dhe mua, acaruan situatën. Askush nuk ka ofenduar anësorin, ishte një moment që ne po protestonim për pozicion jashtë loje. Nuk mund të vijnë aty disa persona, që nuk u takon të vijnë?.

?Ndeshja me Korabin? Është një sfidë e vështirë. Në pesë vitet e fundit, gjysmën e kam kaluar tek Shijaku dhe gjysmën tek Korabi. Në Peshkopi kam qenë si në shtëpinë time, por do mundohem të marr maksimumin e pikëve, sepse na nevojiten më shumë neve se sa atyre?.

?Futbolli nuk është jetë a vdekje. Nëse do të ishte kështu, atëherë unë do e lija trepikëshin kundërshtarit dhe do mendoja për lojtarët e mi. Asnjëherë se kam menduar një sfidë në këtë mënyrë. Kemi një ndeshje me Korabin, ata do të bëjnë punën e tyre, sepse kanë objektivat e tyre. Unë do bëj punën time sepse kam objektivat e mia dhe nëse fitojmë, me 90% jemi ne në grupin e katër të parave dhe jo Vora?.