web counter
LEXO PA REKLAMA!

SHKARKO APP

App Store
Google Play

Gjykata liroi protestuesin/Policia e Shtetit: Gjyqtari i lidhur me krimin

13 Mars 2019, 19:20, Aktualitet CNA

Policia e Shtetit ka reaguar në lidhje me vendimin e Gjykatës së Shkallës së Parë në Fier për lirimin e personit që goditi me gur një punonjës policie.

Në reagimin e tyre thuhet se punonjësit e Policisë së Shtetit kanë mbrojtje të vecantë gjatë ushtrimit të detyrës, dhe se vendimi i gjykatës lidhet me krimin.

Më tej thuhet se Policia e Shtetit do të bëjë denoncim për gjyqtarin Sota, i cili mori vendimin për punonjësin e bashkisë.

Reagimi i Policisë së Shtetit:

Vendimi i sotëm i gjyqtarit të Gjykatës së Shkallës së Parë Fier, Pirro Sota, për të liruar nëpunësin e Bashkisë Mallakastër, që goditi me gur në kokë një punonjës policie në krye të detyrës, ka tronditur të gjithë Policinë e Shtetit.

Arroganca, shpërfillja ekstreme e ligjit dhe injorimi flagrant i provave të pakundërshtueshme dhe i raporteve të shërbimit të Policisë së Shtetit, që provonin atë që ka parë tashmë gjithë Shqipëria, janë të papranueshme.

Punonjësit e Policisë së Shtetit kanë mbrojtjen e veçantë të ligjit, gjatë ushtrimit të detyrës së tyre.

Rreziku për jetën e punonjësve të PSH, shtohet jo vetëm nga papërgjegjshmëria e elementëve kriminalë, por edhe e gjyqtarëve të lidhur me krimin.

Policia e Shtetit e ka dëshmuar me gjakun e qindra dëshmorëve, përgjegjësinë e saj publike dhe nuk mund të pajtohet me vendime skandaloze të ndonjë gjyqtari të papërgjegjshëm, vendime të cilat jo rrallë herë kanë lënë të pandëshkuar jo vetëm autorët e plagosjeve ndaj policëve, si rasti aktual i Fierit, por edhe vrasësit e tyre.

PSH do të ndërmarrë të gjitha masat ligjore si për të mbrojtur jetën e punonjësve të saj, ashtu dhe për të vënë përpara drejtësisë bashkëpunëtorët e krimit, edhe kur këta mbajnë të veshur padrejtësisht mantelin e gjyqtarit.

Policia e Shtetit do të depozitojë padi penale ndaj gjyqtarit Sota, si dhe do të referojë pranë organeve të Vettingut dokumentacionin që provon absurditetin e vendimit të tij. /CNA.al

 





Lajmet e fundit nga