web counter
LEXO PA REKLAMA!

SHKARKO APP

App Store
Google Play

E fundit!

x

Të shkruajmë drejt gjuhën tonë shqipe!

27 Gusht 2018, 09:33, Aktualitet CNA

Nga Edona Marku

* Të gjesh në këso ditësh një shkrim të çfarëdo lloji, por të shkruar saktë qenka paksa e vështirë. Në mjaft raste ndeshim gabime të pafalshme që e cenojnë gjuhën tonë, ose më saktë që tregojnë moskujdesjen dhe mosinteresimin tonë për të mësuar disa rregulla më shumë përreth artit të të shkruarit. Mendoj që të shkruash drejt dhe saktë një gjuhë përbën një art më vete. Gjithaq, të drejtshkruash shqip është mbi të gjitha një detyrim që i takon gjithsecilit prej nesh, një detyrim që doemos duhet ndjerë si i tillë karshi gjuhës.

Ekziston një degë e gjuhësisë, e quajtur “Kultura e gjuhës”, që kuptohet si kujdesi për të shkruar e për të folur gjuhën sipas rregullave të përcaktuara. Në fakt, kjo “kulturë” mbi të gjitha duhet të burojë nga brendia e çdo folësi dhe shkruesi të gjuhës shqipe.

Le të bëjmë një parantezë të shkurtër duke treguar një ndodhi që ka të bëjë pikërisht me çështjen për të cilën po shkruajmë.

( Ne studentët për të paguar studimet tona shpesh kryejmë punë të ndryshme që kanë në bazë shërbimin ndaj klientit, duke bërë që të jesh në kontakt me mjaft njerëz.

Atë ditë, përgjatë orarit të punës, më rastisi si kliente një mësuese e gjuhës shqipe. Ndër të tjera ajo më thotë që dua t’i bëj një urim mamasë për ditëlindje me mbishkrimin:”Edhe 100 mamasë tonë të mbrekullueshme”.

I them me shumë kujdes, që duhej “mamasë sonë”, sepse kemi të bëjmë me rasën dhanore që merr këtë përemër. Gjithaq, mbiemri në fjalë, duhej “të mrekullueshme”. Përgjigjja që marr ishin mijëra ofendime mbi intelektin tim karshi njohjes së gjuhës…).

Ngatërresa apo mosnjohja e përemrave që marrin rasa të ndryshme nuk është problemi më madhor, po ta krahasojmë me mosshkrimin korrekt të disa fjalëve të tjera, (shumë syresh) apo shtimin e heqjen e zanoreve dhe bashkëtingëlloreve në fillim, në mes dhe në fund të fjalës.

Shkrimi drejt i gjuhës nuk është vetëm një detyrë e gjuhëtarëve, por secilit prej nesh. Madje dhe Heidegger thotë që:” Gjuha është tepër e rëndësishme për t’ua lënë vetëm gjuhëtarëve.”

Që në hapat e parë të dijes, mësuesit duhet  t’i kushtojnë shumë rëndësi këtij problemi, duke ushqyer që në bazë tek fëmija kulturën gjuhësore dhe rëndësinë që ka ajo tek çdo individ që mëson të shkruajë dhe flasë një gjuhë.

Në mbyllje të kësaj çështjeje, do citojmë një thënie të E. Çabej :?Gjuha është pasqyra më e qartë e një kombi dhe e kulturës së tij?. Një shprehje që tregon mjaft qartë se sa relevante është gjuha dhe shkrimi drejt i saj./ CNA.al





Lajmet e fundit nga