SHBA përsërit ultimatumin/ Qeveria e presidenca fshehin detajet e takimit me delegacionin franko-gjerman

12 Janar 2018, 16:06, Aktualitet CNA

Shtetet e Bashkuara të Amerikës (SHBA-ja) i kanë bërë thirrje sërish palës kosovare që të heqë dorë përfundimisht nga ideja për shfuqizimin e Gjykatës Speciale. Një gjë të tillë më përpara e kanë kërkuar edhe shtetet e QUINT-it, shkruan “Zëri.Info”, sipas të cilit dy ditë më parë në Kosovë ka ardhur edhe një delegacion franko-gjerman pas shqetësimeve për shfuqizimin e Dhomave të Specializuara.

Mirëpo, ndonëse ky delegacion ka zhvilluar vizita me krerët institucionalë (kryeministrin Ramush Haradinajn e presidentin Hashim Thaçin) institucionet përkatëse nuk kanë dhënë detaje se për çka është diskutuar. Ndërkohë, pos krerëve institucionalë, gjatë ditës së djeshme takim me këtë delegacion kanë zhvilluar edhe dy partitë opozitare, LDK-ja e LVV-ja.

Përderisa LDK-ja ka njoftuar se gjatë takimit me këtë delegacion emisarët kanë shprehur brengosjen e thellë të Berlinit dhe të Parisit për idenë e shfuqizimit të Speciales, nga LVV-ja kanë thënë se atyre u janë përcjellë qëndrimet e këtij subjekti mbi padrejtësinë e kësaj Gjykate.

Duke dashur të kompesojnë këtë qëndrim arbitrar të qeverisë e presidencës Ambasada Gjermane në Prishtinë ka njoftuar për vizitën e delegacionit të jashtëm në Kosovë, i përbërë nga i dërguari i posaçëm për Evropën Juglindore, Turqinë dhe shtetet e EFTA-s në Ministrinë Gjermane të Punëve të Jashtme, Christian Hellbach, dhe shefi i Departamentit të Ballkanit Perëndimor të Ministrisë Franceze të Punëve të Jashtme dhe Evropiane, Thomas Bertin.

Me anë të këtij njoftimi është bërë e ditur se kjo vizitë ka ardhur pas idesë për shfuqizimin e Gjykatës Speciale, e cila u iniciua nga 43 deputetë më 22 dhjetor 2017.

?Vizita zhvillohet në sfondin e shqetësimeve në Berlin dhe në Paris lidhur me përpjekjet e fundit për ta shfuqizuar Ligjin mbi Dhomat e Specializuara dhe Zyrën e Prokurorit të Specializuar?, është thënë në komunikatë.

Ka qenë takim i mbyllur dhe nuk ka komunikatë zyrtare se çka është biseduar nga palët e përfshira?, thuhet në përgjigjen e Qeverisë dhënë ?Zërit?. Pyetjet i janë dërguar edhe Zyrës së Presidentit, porse nuk është marrë asnjë përgjigje.