Reforma/Berisha: Fituan parimet e drejtësisë së pavarur! Garantuam që vendimmarrja të jetë shqiptare

20 Korrik 2016, 14:42, Aktualitet CNA

Ish-Kryeministri Sali Berisha e cilësoi arritjen e konsensusit për reformën në drejtësi si fitoren e parimeve të drejtësisë së pavarur. Përmes një komenti në rrjetet sociale, Berisha shpreh vlerësimin më të madh për rolin udhëheqës të opozitës në këtë process, që garantoi moskapjen e sistemit nga Qeveria.

Komenti i ish-Kryeministrit Sali Berisha

Një fitore e parimeve të larta të një drejtësie të pavarur, efikase, transparente, të përgjegjshme!

Te dashur miq, sot u finalizuan negociatat për nenin e fundit të reformes së sistemit të drejtësisë në vendin tonë!

Me këtë rast shpreh krenarinë dhe vlerësimin tim më të madh për rolin udhëheqës dhe përcaktues të opozitës shqiptare në tërësi dhe PD në veçanti, e cila me oponencën e saj në dy projektet që dërgoi në Komisionin e Venecias dhe projektin që u përdor për propozimin hibrid, negociata konstruktive të javes së fundit arriti:

– garanitimin e një projekti reforme që shpëtoi sistemin nga kapja qeveritare, nga kthetrat e njeriut që donte të behej me cdo kusht kryehetues, kryegjykatës, kryeprokuror i vendit, kujtoni vetëm projektin e tij për FBI personale të tij, përpjekjet e tjera absurde për të bllokuar për këtë shkak reformën në cdo moment.
– garantimin për qytetarët shqiptare të lirive dhe të drejtave që gëzojnë nga Konventa Europiane e të Drejtave të Njeriut dhe Kushtetuta e tyre duke hedhur në kosh përpjekjet për t’iu mohuar me Kushtetutë këto të drejta dhe zhvendosur ata në hapësira orëelliane apo të të shkuarës së tyre të zezë hoxhiste nga Old Mayer-i, Edvin Shullazi.
– garantoi një proces vlerësimi transparent, ligjor, objektiv të bazuar në meritën dhe integritetin profesional dhe njërezor të prokurorëve dhe gjykatësve tanë dhe jo në opinione, thashetheme dhe marrëzira që deshironte i suksesshmi imagjinar!

– garantoi që në të gjithë procesin e ndërtimit të piramidës së drejtesise vendimmarrja të jete ekskluzivisht si në çdo vend tjeter sovran në duart e shqiptarve dhe jo të të huajve, siç iu deklaroi shqiptareve me qindra here Old Mayer-i, Edvin Kristaq Rama.
– garantoi mbështetje të çmuar nga miqtë dhe partnerët ndërkombëtar në procesin e Vettingut, gjë që do ta bëjë më të besueshme dhe më transparent reformën e sistemit të drejtësisë, defacto të udhëhequr nga opozita, të cilën Edi Rama bëri gjithcka që ta përjashtonte që në fillim nga procesi por dështoi në mënyrë spektakolare.

Te dashur miq, le të falenderojmë nga zemra të gjithe ata që bënë përfundimin me sukses të këtij projekti që do votojmë nesër në Parlament.

Një falenderim dhe mirënjohje të veçantë miqve dhe partnereve tanë, mbështetja e të cilëve ishte e një rëndësie thelbësore në përfundimin e hartimit të kësaj reforme të bazuar në parimet e larta të drejtësisë së pavarur, eficente, transparente, të përgjegjshme para ligjit. /citynews/