Akuzat për të shtëna me revole në 1991/ Reagon Peza: Lulzim, mos u ngatërro me këtë histori!

27 Maj 2016, 16:55, Aktualitet CNA

Deputeti socialist Alfred Peza ka reaguar pas akuzave të përcjella me anën e mesazhit të një qytetari nga Kreu i PD-së Lulzim Basha, ku thuhej se Peza kishte qëlluar me armë drejt disa personave në 22 Nëntor të vitit 1991. Përmes një reagimi në rrjetet sociale deputeti socialist i ka kërkuar Kryetarit demokrat që mos të përfshihet në një histori me të cilën ai nuk ka lidhje.

“Lulëzim! Ky demokrati yt i orëve të para që paska drejtuar revoltën e studentëve ushtarak kundër diktaturës dhe s’ka kurajo të thotë as emrin, ose më ka ngatërruar mua me Bujar Nishanin ose të ngatërron ty qëllimisht në këtë histori me të cilën ti nuk ke lidhje! Po unë s’kam punë me këtë tipin pa emër, po me një emër të përveçëm dhe të njohur nga të gjithë: Flamur Noka!” shkruan Peza.

Në reagimin e tij, deputeti socialist ka akuzuar kolegun e tij demokrat Flamur Noka se ka qenë pjesë e UDB-së. “Pse

nuk përgjigjesh për fshehjen që Flamur Noka i ka bërë bashkëbisedimeve të faktuara me oficerët e UDB-së kur është ndaluar në vitin 1991?!
Pse i dredhon përballjes me një fakt konkret që implikon rëndë një deputet të PD-së në shkeljen flagrante të ligjit të dekriminalizimit?!
Pse replikon me të shara e me letra anonime ndërkohë që je i dyshuar publikisht tanimë si një marifetçi i madh dhe i papërgjegjshëm që u rrokanise kokën shqiptarëve e ndërkombëtarëve për 19 kriminelet imagjinare të PS në Parlament?!” pyet deputeti socialist.

Ai shton se Basha duhet të gjejë një mënyrë më të sjellshme për të thënë atë që nuk e thotë dot. “Mirë nuk gjete jo 19, po asnjë, sepse nuk kishe ku i gjeje, pasi s’ka të tillë, po të paktën përgjigju për Flamur Nokën…
Unë e di pse s’përgjigjesh, sepse ti s’ke sesi përgjigjesh, përderisa nuk je vetja, po vetëm çiraku i ustait plak, Saliut! Po të paktën si çun Hollande gjej një mënyrë më të sjellshme për të mos thënë atë që nuk thua dot se bëhesh fare banal kur deri edhe jargët i ke të plakut!” përfundon reagimin e tij deputeti socialist Alfred Peza./citynews