E fundit!

12:05 Aktualitet

Protestat/ Balla: Dritan Goxhaj punon për regjimin iranian

Kreu i grupit parlamentar të PS-së Taulant Balla, në një d...

PROFILI/ Rrezatimi dhe ulja e Rezart Taçit, kolonjarit të transaksioneve më të çuditshme shqiptare

6 Janar 2016, 19:03, Aktualitet CNA

Një 26-vjeçar nga Kolonja, u rikthye në Shqipëri në vitin 1997 nga Milano ku punonte si picajol, por menjëherë bëri bujë.

Jo thjesht se rrënjët familjare i kishte të sojshme me origjinë nga Kolonja, por se i hyri një biznesi ku o digjesh o fiton: naftës.

Rezart Taçi ishte vetëm 26 vjeç kur themeloi Taçi Oil International, por për 5 vjet arriti të ulej në tavolinë me bigët e mëdhenj të politikës dhe zyrat i kishte në pikën më të fuqishme të bllokut.

Kishte administrator këshilltarin e Fatos Nanos dhe ulej shpesh me kryeministrin e asaj kohe.

Për herë të parë, emri i Rezart Taçit do artikulohej në publik nga Sali Berisha, në një mënyrë shumë përçmuese, si një biznesmen i afërt me Nanon e që po bënte namin me kontrabandë nafte. ?Një farë Taçi, Taçi?.?, do psherrëtinte egër Berisha, i ndodhur përballë Sokol Ballës në Vizion Plus. Eshtë viti 2004. Ndërkohë që pak vite më pas, duke qenë në pushtet, Berisha do e mohonte haptazi që e kish përmendur ndonjëherë emrin e tij, duke i thënë gjysëm me të qeshur Alfred Pezës në Ora News, se kishte thënë Naçi e jo Taçi(!).

Viti 2005. Sali Berisha fiton zgjedhjet dhe vjen në pushtet. Bëhet kryeministër dhe menjëherë Rezart Taçi nis të kujtojë vitet kur ka qenë simpatizant i PD-së dhe punësimin e të atit në detyra të lartë në qeverisjen e djathtë.

Brenda dy vitesh, ai blen thuajse 70% të tregut me pakicë të karburanteve dhe tabela e tij e gjelbërt me parullën ?Me ne vetëm fluturoni!? e shikoje nga Shkodra deri në Konispol. Ndërkohë që dhe Erseka e tij në futboll, arrin të luajë deri në Superligë.

Pas karburanteve hap dhe një shkollë që i vë emrin e shpikësit të dinamitit që më pas u bë filantropist, ?Nobel?; dhe nuk kalon shumë dhe Taçi bëhet një nga dhuruesit më të mëdhenj të fondacionit që drejton gruaja e kryeministrit të atëhershëm.

Shkurt, nga armik u bë një nga njerëzit e afërt të Sali Berishës. Në fund të mandatit të parë qeverisës, Berisha i jep biznesmenit kolonjar të vetmen uzinë të përpunimit të naftës në vend, apo të ashtuquajturën kompani shtetërore,Armo.

Këtu nisin dhe lëvizjet marramendëse të 45-vjeçarit që fillon e bëhet i njohur për transaksione të çuditshme nga Azerbaxhani, nga ku erdhën paratë që u ble Armo. Para që kaluan nëpërmjet një banke shumë të njohur me lidhje të forta politike.

Krijon marrëdhënie me Behxhet Pacollin dhe i blen televizionin Alsat, të cilin në atë kohë e drejtonte i biri i biznesmenit të ndjerë nga Kërçova, Vehbi Velia.

Pajton avokatët më të mirë dhe blen analistët më në zë. Kurse në ambiente publike kërcënon gazetarët e njohur Mero Maze dhe Andi Bushati, pasi ata e kishin akuzuar për lidhje të dyshimta me djalin e kryeministrit dhe me Damir Fazliçin.

Por nuk mbaron me kaq. Pasi shpall një projekt gjigand filantropie, bëhet aksioner i Milan-it të Berluskonit dhe sjell në Tiranë kuqezinjtë e famshëm duke rritur bujën në Itali. Pas pak, arrin të bindë të udhëtojnë drejt Tiranës as më shumë e as më pak por Galaktikët e Real Madridit me Kristiano Ronaldon që çmendi disa vajza që mbushën stadiumin ?Qemal Stafa?, por që?u fikën dritat duke lemerisur kështu mbretërorët e Spanjës.

Megjithatë, Taçi thonë se pagoi 2.5 milionë euro për atë ndeshje duke ia kaluar edhe sheikëve arabë që e kërkonin Realin për miqësore luksi në vendet e tyre.

Në fund të mandatit të qeverisë Berisha, rezultoi se ishte njeriu që qëndronte prapa operacionit për të blerë kompaninë shtetërore të naftës Albpetrol, por që u anulua rrugës.

Humbja e Berishës e detyroi të niste kontaktet me qeverinë e Edi Ramës. Dhe një ish-këshilltar i tij gjendej në ekipin socialist të bashkisë Tiranë.

Nuk i eci dhe vrapoi në Itali ku bleu klubin e famshëm por tashmë të rrënuar të Parmës. Nuk qëndroi gjatë dhe u largua sërish duke e shitur, por kësaj radhe përfundimisht.

Në Tiranë nxori në ankand televizionin me gjithçka kishte, por edhe të gjitha pikat e karburanteve që menjëherë ndërruan emrat.

Një realitet tjetër kishte ndodhur në hidrokarbure. Armo tashmë është një gjigand i ngordhur dhe operatorë të tjerë kanë hyrë në treg.

Një ditë më parë, Prokuroria pikërisht për Armo-n e cilësoi zyrtarisht të pandehur për evazion fiskal, çka do ta detyrojë të flasë edhe për operacionet e mëdha me të cilat u ble uzina e Ballshit. Por a do të flasë??! Ai tashmë nuk dihet se ku frymon./ Tesheshi.com