S’mjaftojnë milionat, të djeg i katërti me 20 pikë më pak / Tirana dhe Partizani ende s’e dinë çfarë i pret nga formula e re

23 Korrik 2023, 12:25, Sport CNA

Formula e re e kampionatit, me gjithë dëshirën e mirë të FSHF-së dhe një pjese të madhe të klubeve për të ndryshuar diçka, apo për ta bërë më tërheqës fundin e sezonit, mbetet shumë e diskutueshme, shumë e paqartë dhe, mbi të gjitha, shumë e rrezikshme.

“Panorama Sport” dy ditë më parë bëri një analizë sa u përket të panjohurave që ofron kjo formulë, por natyrisht do të ishte e udhës që edhe grupe të interesit, ato që janë të prekura drejtpërdrejtë, të kërkonin transparencë në këtë rast dhe të sigurohen mirë.

Bëhet fjalë për kampionatin kombëtar, në të cilin po aplikohet një formulë që asnjë vend tjetër europian nuk e ka dhe mbi të gjitha ngre dilema të mëdha sa i përket kampionatizmit.

Pse? Sepse imagjinoni për një moment që klube, të cilat investojnë mbi një milion euro në sezon, si Tirana me Partizanin aktualisht, por edhe Skënderbeu me Kukësin dikur, në fund t’u zerohen pikët dhe me tri ndeshje t’ua marrë titullin vendi i katërt që ato mund ta kenë lënë 20 pikë mbrapa deri në maj… A shkon kjo? A është e ndershme kështu?

Por jo vetëm kaq. Është edhe ana tjetër e medaljes. Supozojmë që Vllaznia me Teutën sezonin tjetër udhëheqin kampionatin deri në fund dhe njëra prej tyre e mbyll e para në renditje.

Po pastaj? Pastaj titullin do të duhet ta luajë në “Air Albania” kundër Partizanit dhe Tiranës, që dukshëm janë të favorizuar sa u përket tifozëve dhe atmosferës që i rrethon.

A është kjo e ndershme dhe korrekte? Do të duhej të përgjigjeshin klubet në fakt, por deri tani edhe kundërshtimet i kanë pasur nën zë. Partizani dhe Tirana do ta kuptojnë ndoshta në fund të sezonit se nuk vlen që të investojnë pothuajse dyfishin e të tjerëve për të siguruar një trofe.

Mundet që edhe të kesh një ekip mbi mesataren, të kapësh vendin e katërt dhe pastaj të luash “bingo” në “Final 4”. Nëse fiton, atëherë i gëzohesh titullit dhe 1 milion eurove. Nëse nuk ia del, atëherë ngushëllohesh me faktin që nuk shpenzove dyfishin e parave.

Por a zhvillohet kështu futbolli në vendin tonë? Këtë duhet ta thonë ata që kanë studiuar formulën (nëse e kanë bërë) dhe të shpjegojnë se sa para sjell më shumë kjo për kampionatin shqiptar, sa tifozë pritet të shtohen dhe sa tërheqës e të besueshëm e bën kjo kampionatin.

Sepse për hir të së vërtetës, është paradoks i madh që nga njëra anë flitet për formula të reja dhe nga ana tjetër nuk dihet se çfarë do të ndodhë me Kukësin që është në pikë të hallit financiarisht, apo me Erzenin që deri tani është komplet në ajër dhe nuk ka as skuadër e as trajner.