E fundit!

12:33 Aktualitet

EKSKLUZIVE/ SPAK-u, në Bashkinë e Tiranës

SPAK ka zbarkuar në Bashkinë e Tiranës. Oficerët e BKH me ...

Silvinjo i kënaqet fitores me Gjibraltarin: I lumtur për debutuesit

4 Shtator 2025, 23:31, Sport CNA

Shqipëria fitoi minimalisht ndaj Gjibraltarit në miqësore. Në këtë takim, trajneri Silvinjo aplikoi disa ndryshime në formacion, duke i dhënë hapësirë lojtarëve të rinj që debutuan nga minuta e parë. Loja e kuqezinjve nuk pati ritmin e zakonshëm, çka solli edhe kritika nga tifozët mbi paraqitjen e skuadrës. Megjithatë, për stafin teknik kjo ndeshje shërbeu si test në prag të sfidës zyrtare ndaj Letonisë.

Në prononcimin pas ndeshjes, Silvinji theksoi rëndësinë e përgatitjes për ndeshjet kualifikuese, duke vlerësuar kontributin e futbollistëve të rinj. Ai përmendi edhe një përvojë personale, për të treguar presionin që shoqëron debutimin me një kombëtare. Silvinjo u shpreh se atmosfera në grup është pozitive dhe puna në stërvitje do të jetë vendimtare për përballjen e ardhshme. Në fund, ai bëri apel edhe për mbështetjen e tifozëve në takimin e radhës në Tiranë.

“Ishte një ndeshje e vështirë. E kam thënë që është gjithmonë e vështirë të përgatitësh një miqësore para një ndeshje të rëndësishme zyrtare siç është Letonia. Është shumë e vështirë. Por ata kanë bërë shumë mirë, 3-4 lojtarë të rinj, që luajnë për herë të parë nga fillimi me ne. Kanë bërë shumë mirë, nuk është e thjeshtë për ta. Mua më kujtohet që në përfaqësuesen e Brazilit, kur debutova, nuk më ka zënë gjumi natën. Jam i lumtur për ta. Edhe për të tjerët. Kemi bërë një paraqitje të mirë, në një ndeshje të vështirë, nuk ishte e thjeshtë.

Kemi bërë diçka të rëndësishme, kemi parë ndonjë lëvizje, por kaq, është gjithçka ende e hapur. Kemi 3-4 ditë stërvitje të mira për të përgatitur shumë mirë një ndeshje shumë të rëndësishme për ne si ajo me Letoninë në shtëpi. Do punojmë në ditët në vijim dhe është çdo gjë e hapur.

Kemi bërë 3-4 ditë në këtë grumbullim, kemi parë se është një ambient shumë i mirë mes nesh. Do kthehemi në Tiranë nesër dhe të presim publikun tonë, që të mund të na japë një shtysë të mirë se është një ndeshje e rëndësishme për ne. Duhet të japim gjithçka në fushë, ajo që duam ne është një atmosferë e mirë mes të gjithë nesh, edhe futbollistëve”, deklaroi Silvinjo.

Ndeshja e radhës për Shqipërinë do të jetë ndaj Letonisë më 9 shtator, për kualifikueset e Botërorit.