Pritjes i vjen fundi! Sot nis Botërori, Meksika ngre siparin e turneut madhor

11 Qershor 2026, 07:03, Sport CNA

Pritjes i vjen fundi! Sot nis Botërori, Meksika ngre siparin e turneut

Pritjes i ka ardhur fundi. Sot ngre siparin Kupa e Botës 2026, turneu më i rëndësishëm në rang kombëtaresh.

Ky edicion hyn në histori si turneu i parë i organizuar njëkohësisht nga tri vende. Shtetet e Bashkuara të Amerikës, Meksika dhe Kanadaja do të jenë shtetet e ndeshjeve të Botërorit.

Starti zyrtar i turneut do të vijë sot në Mexico City. Stadiumi legjendar “Azteca” do të presë ceremoninë inauguruese dhe ndeshjen e parë të Botërorit, ku Meksika do të përballet me Afrikën e Jugut në orën 21:00. Organizatorët kanë planifikuar që ceremonia hapëse të nisë 90 minuta përpara fillimit të takimit, duke i dhënë publikut një program të plotë artistik dhe kulturor para sfidës së parë të turneut.

Për Meksikën, ky është një rikthim në organizimin e Kupës së Botës pas edicioneve të viteve 1970 dhe 1986. Hapja e turneut me përballjen ndaj Afrikës së Jugut konsiderohet edhe një kujtesë simbolike e Botërorit të vitit 2010, i zhvilluar në vendin afrikan.

Ndërkohë, Kanadaja do të shkruajë një kapitull të ri në historinë e saj sportive, pasi për herë të parë do të jetë vend mikpritës i Kupës së Botës. Ndeshja e parë në territorin kanadez do të luhet më 12 qershor në Toronto, ku kombëtarja vendase do të përballet me Bosnje dhe Hercegovinën. Kjo do të jetë një nga ngjarjet më të rëndësishme sportive të organizuara ndonjëherë në vend.

Edhe Shtetet e Bashkuara do të kenë një rol qendror në këtë edicion. Pas organizimit të Botërorit të vitit 1994, amerikanët do të presin pjesën më të madhe të ndeshjeve të turneut. Ceremonia e tyre hapëse do të zhvillohet më 13 qershor në Los Angeles, e shoqëruar me ndeshjen mes Shteteve të Bashkuara dhe Paraguajit.

Botërori 2026 do të jetë gjithashtu edicioni me numrin më të madh të ndeshjeve në histori. Në total do të zhvillohen 104 sfida, të shpërndara në 16 qytete pritëse në tre shtetet organizatore. Turneu do të zgjasë më shumë se një muaj, nga 11 qershori deri më 19 korrik, datë në të cilën do të luhet finalja e madhe në Nju Jork.

Një element i përbashkët i të gjitha ceremonive hapëse do të jetë mesazhi për bashkimin e njerëzve përmes futbollit, pavarësisht kufijve dhe kulturave të ndryshme. Krahas pjesës sportive, organizatorët po përgatisin edhe një program artistik me pjesëmarrjen e emrave të njohur të muzikës ndërkombëtare.

Me tri vende mikpritëse, 16 qytete organizatore, 104 ndeshje dhe një kalendar që shtrihet nga 11 qershori deri më 19 korrik, Kupa e Botës 2026 pritet të jetë edicioni më i madh i zhvilluar ndonjëherë.