“Martini ka inat personal, tentoi me ndërhyrje”, reagon Hygerta Sako: Daton nga viti 2021…

9 Prill 2026, 09:05, Sport CNA

“Martini ka inat personal, tentoi me ndërhyrje”, reagon Hygerta

Përplasja mes trajnerit Edi Martini dhe moderatores Hygerta Sako ka kaluar në një tjetër nivel, duke përfshirë tashmë edhe klubin e Vllaznisë.

Pas akuzave të trajnerit për gjuhë të papërshtatshme në studio, klubi shkodran ka kërcënuar me hapa ligjorë ndaj prezantueses, duke kërkuar ndjesë publike për etiketimet ndaj teknikut të tyre.

Megjithatë, Sako ka reaguar ashpër në rrjetet sociale, duke pretenduar se i gjithë tensioni buron nga një inat personal i Martinit që daton prej vitit 2021.

Sipas saj, trajneri mban hatërmbetje për faktin se në atë kohë trofeu i "Trajnerit të Vitit" në RTSH iu dha Thomas Brdaric-it dhe jo atij. Moderatorja mohoi çdo akuzë për racizëm, duke e cilësuar sjelljen e Martinit si harbutëri profesionale dhe mungesë etike të përsëritur. Ajo ftoi klubin e Vllaznisë që përpara se të bëjë deklarata ndaj gazetarëve, të merret me edukimin publik të trajnerit të vet.

REAGIMI I HYGERTA SAKOS:

Nuk doja kurrsesi te prononcohesha sot, por duke parë deklaratat aspak etike dhe fyese kundra meje, e ndjej te nevojshme te sqaroj jo vetem publikun por dhe tifozet e Vllaznise dhe presidencen e saj se:

E gjithe kjo situate ka rrjedhur nga nje inat personal i Edi Martinit me mua qe daton qe ne vitin 2021 kur si Rtsh Sport ne organizonim “Me te miret e Vitit”. Ne votimin transparent prej 7 specialistesh kryesore te studiove televizive, nder ta emra te nderuar si Shkelqim Muca, Sulejman Starova, Astrit Hafizi, Redi Jupi etj, 4 prej tyre votuan si trajnerin me te mire te Vitit trajnerin e Vllaznise se atij edicioni Thomas Brdaric dhe 3 prej tyre Edi Martinin. Nuk po flas per nderhyrjet qe Martini dhe njerez afër tij, ndërmoren qe te ndryshohej votimi e trofeu t’i jepej atij. Martini mendon se trofeun e kam dhene une nderkohe qe une isha thjesht moderatore dhe qe formulën e votimit e kam bërë publike për mediat. Prej asaj kohe ky zoteri nuk i ka kursyer ofendimet ndaj meje tek koleget e mi sa here i ka takuar. E megjithate s’kam reaguar por kam vazhduar ta trajtoj me respekt ne cdo dalje televizive, duke ruajtur etikën profesionale. Pra, të dashur tifoze, inati personal i Martinit me mua eshte pikerisht sepse u vleresua me merite nje trajner i Vllaznise dhe s’po shkoj me tej duke ju kujtuar menyren se si festoi kur i hoqi titullin pikerisht Vllaznise ne 2021!

Per te ardhur tek ngjarja e diteve te fundit. Pas fitores me Partizanin e nisi intervisten me nje ironi te pajustifikueshme te cilen ia kalova me qetesi e pa e komentuar me tej. Ne fund iu drejtova me nje pyetje profesionale te ciles iu pergjigj me harbuteri dhe aspak profesionalizem. Martini per inate personale nuk mund te sillet jo etik me gazetaret dhe pastaj te ndjehet i fyer. Mos te harrojme qe po flasim per nje trajner qe eshte denuar 3 here nga Komisioni i Disiplines per sjellje te shemtuara e jo sportive.

Une Shkodren dhe Vllaznine e dua, per gjithe emocionet qe i dhuron futbollit si djepi i futbollit e dhjetra talenteve.

Por, perpara se KF Vllaznia te beje deklarata te nxituara ndaj nje gazetareje qe prej 12 vjetesh ka bere maksimumin per t’i dhene kesaj skuadre vlerat qe meriton, le te merret me trajnerin e saj per t’i rregulluar sjelljen publike!

Me respekt Hygerta Sako