Krijuan skema mashtruese me 3 milionë euro/ Prangoset në Rinas italiani i shumëkërkuar

17 Dhjetor 2022, 13:50, Kronika CNA

Krijuan skema mashtruese me 3 milionë euro/ Prangoset në Rinas

Policia e Tiranës ka arrestuar një shtetas të shpallur në kërkim në kuadër të operacionit të koduar “Damage”.

Ai akuzohet për krijimin e skemave mashtruese me tatimin mbi vlerën e shtuar.

Në shtator u arrestuan 7 persona, ndërsa sot në pranga ka përfunduar 60-vjeçari Mario Guadagnoli me banim në Itali.

Dyshohet se 60-vjeçari në bashkëpunim me 12 shtetas të tjerë, përmes mashtrimit kanë krijuar subjekte tregtare fiktive, përmes të cilave kanë qarkulluar shuma të mëdha parash, të padeklaruara në organet tatimore, duke i shkaktuar kështu shtetit shqiptar, një dëm financiar prej 3 milionë eurosh.

Njoftimi i policisë:

Tiranë/ Vijon operacioni policor i koduar “Damage”, shkon në 8 numri i të arrestuarve.

Vihet në pranga një shtetas i shpallur në kërkim për veprën penale “Krijimi i skemave mashtruese me tatimin mbi vlerën e shtuar”.

Në shtator 2022, në kuadër të këtij operacioni, janë vënë në pranga 7 shtetas.

Specialistët e Seksionit për Hetimin e Krimeve Ekonomiko-Financiare, në bashkëpunim me Komisariatin e Policisë Rinas, kanë ndaluar shtetasin M. G., 60 vjeç, banues në Itali, i shpallur në kërkim në kuadër të operacionit policor të koduar “Damage”, për veprën penale “Krijimi i skemave mashtruese me tatimin mbi vlerën e shtuar”.

60-vjeçari, në bashkëpunim me 12 shtetas të tjerë (7 të vënë në pranga, 5 ende në kërkim) dyshohet se përmes mashtrimit, kanë krijuar dhe menaxhuar subjekte tregtare fiktive, nëpërmjet të cilave kanë qarkulluar vlera të konsiderueshme parash, të padeklaruara në organet tatimore, duke i shkaktuar kështu shtetit shqiptar, një dëm financiar prej 3 milionë eurosh./CNA.al