Grabitja në Rinas/ Kamerat kanë filmuar vetëm 2 minuta

1 Korrik 2016, 17:52, Aktualitet CNA

Grabitja spektakolare e ndodhur mesditën e djeshme ka tronditur jo vetëm opinionin publik, por ka vënë seriozisht në diskutim sigurinë kombëtare. Nga media është konsideruar si një nga grabitjet më spektakolare të ndodhura ndonjëherë në vendin tonë, por jo vetëm, duke marrë parasysh lehtësinë dhe gjakftohtësin se si kanë levizur gjërat në vetëm dy minuta.

Kamerat e sigurisë në aeroportin e Rinasit kanë filmuar dy minuta e ca aksion, pasi disa kamera të tjera, që mbulojnë një pjesë të perimetrit të jashtëm të aeroportit ishin jashtë funksionit.

Historia e ngjarjes ka filluar rreth orës 14:20 të ditës së djeshme, duke ju referuar pamjeve filmike, bëjnë me dije burimet.

Në vendkalimin e avionit të linjës, ndodheshin avioni, përballë tij makina e blinduar Nazeri-2000, që kishte edhe parat e transportuara, në mes tyre, pikërisht në turirin e makinës së blinduar, ndodhej një makinë e dytë, ajo është makina që shoqëron avionët e linjave pas uljes për në vendalimin e tyre. Makinë e shërbimit të konçesionarit të Rinasit-TIA.

Në orën 14:22 të ditës së djeshme, gjëndja në vendin e grabitjes është po e tillë, pa ndryshime në vendodhjen e avionit, makinës së blinduar të parave dhe makinës së shërbimit të aeroportit.

Mirëpo, në orën 14: 24, benzi i grabitësve mbërrin aty dhe parkon vetëm 10-12 metra larg nga makina e parave, ndërsa makina e shërbimeve dhe avioni të gjendur thuajse në një vijë të drejtë.

Nga pamjet, duket qartë se nga makina e grabitësve, del vetëm njëri nga ata, ndërsa drejtohet në derën e hapur nga krahu i djathtë i makinës së blindur të parave, kurse makina e shërbimit të aeroportit nis të levizë dhe largohet nga vendi ku po qëndronte prej disa minutash, para se të niste grabitja.

Pamjet tregojnë, sipas po të njëjtit burim, se nga makina nuk pati asnjë reagim, përveç largimit në krahun e kundërt me vendparkimin e makinës së grabitësve.

Me të ndodhur largimi i makinës së shërbimeve të aeroportit, grabitësi i parë kalon në krahun tjetër të makinës së blinduar ku ishin paratë, nga pjesa e përparme e saj.

Pikërisht në këtë çast, pamjet tregojnë se një grabitës i dytë del nga makina e tyre dhe i drejtohet portës në krahun e djathtë të makinës së blinduar, sapo ai mbërrin atje, thuajse njëkohësisht, para makinës së blinduar, ngjitur me të, mbërrin një tjetër makinë, kjo e fundit, është makina e shërbimit kargo të aeroportit të Rinasit.

Burimi, tregon se pamjet e videos, të lënë të kuptosh se makina ka ndaluar pikërisht në vendin ku po ndodhte grabitja, por çuditërisht asnjë person nuk del apo vepron nga makina e kargos.

Grabitësit e ngarkuar me thasë në duar, largohen nga makina e blinduar dhe vrapojnë në drejtim të makinës së tyre.

Por vetëm atëherë kur dy grabitësit mbërrijnë dhe ulen në makinën e tyre, makina e shërbimit kargo të aeroportit, lëviz nga vendi dhe bën përpara duke kryer një gjysmë harku, përsëri në ballinë të makinës së grabitësve pa vepruar në drejtim të tyre.

Me të përshkruar 20 metra në këtë trajektore, makina e grabitësve niset, merr një hark në krahun e djathtë, kalon mu ngjitur me pjesën e pasme të makinës së shërbimit kargo të aeroportit e më pas vijon drejt përpara me shpejtësi.

Ndërsa makina e shërbimit të aeroportit, që kishte ndaluar në vend, nis të vijojë trajektoren dhe parkon thuajse në vendin ku ishte parkuar makina e grabitësve, gjatë momentit të ngjarjes.

E çuditshme, por kjo ka ndodhur vetëm në dy minuta e ca sekonda, kaq janë dhe pamjet ku është fiksuar grabitja./opinion