Iu rrezikua jeta që në lindje, historia prekëse e lojtarit të Zvicrës

13 Qershor 2026, 17:23, Sport CNA

Iu rrezikua jeta që në lindje, historia prekëse e lojtarit

Mbrojtësi i kombëtares së Zvicrës, Ricardo Rodriguez, po përgatitet të regjistrojë pjesëmarrjen e tij të katërt në një fazë finale të Kampionatit Botëror. 33-vjeçari, i cili aktualisht aktivizohet në rradhët e Real Betisit në Spanjë, është përfshirë në listën zyrtare të lojtarëve të përzgjedhur për këtë turne global, krahas emrave me përvojë si kapiteni Granit Xhaka dhe anësori Dan Ndoye.

Zvicra do të jetë pjesë e Grupit B, ku do të përballet me njërën nga vendet bashkëorganizuese, Kanadanë, si dhe me Bosnjë-Hercegovinën e Katarin. Përtej aspektit sportiv, karriera e Rodriguezit, me 137 ndeshje ndërkombëtare, është ndërtuar mbi tejkalimin e një sfide të rëndë shëndetësore që në momentin e lindjes.

Gjatë muajit të tetë të shtatzënisë së nënës së tij, kontrollet mjekësore zbuluan se Rodriguez vuante nga një hernie diafragmatike e lindur. Kjo anomali klinike kishte shkaktuar zhvendosjen e stomakut, shpretkes, mëlçisë dhe zorrëve drejt zgavrës së gjoksit, duke shtypur mushkëritë. Raportet mjekësore të asaj kohe i dhanë të porsalindurit vetëm 50 për qind shanse për të jetuar, çka bëri që ai t'i nënshtrohej një ndërhyrjeje kirurgjikale urgjente menjëherë pas lindjes.

Gjatë tri viteve të para të jetës, lojtarit iu desh t'u nënshtrohej kontrolleve të rregullta spitalore çdo gjashtë muaj dhe të shmangte infeksionet respiratore për shkak të ndjeshmërisë së lartë të sistemit të tij të frymëmarrjes.

Pavarësisht prognozave fillestare mjekësore që përjashtonin mundësinë e angazhimit të tij në sportin e elitës, Rodriguez u konsolidua si një nga mbrojtësit e majtë më të qëndrueshëm në futbollin europian. Ish-lojtari i Milanit dhe Wolfsburgut mban një rekord të veçantë me kombëtaren helvetike, duke mos humbur asnjë minutë lojë në tri edicionet e fundit të Kupës së Botës ku ka marrë pjesë. Në nivel klubesh, pjesë e biografisë së tij sportive janë fitimi i Kupës dhe Superkupës së Gjermanisë, si dhe shpallja si Futbollisti Zviceran i Vitit në vitin 2014.

Në sezonet e fundit, Rodriguez ka qenë pjesë e Real Betisit, me të cilët arriti deri në finalen e UEFA Conference League pak më shumë se një vit më parë, ku u mposhtën nga Chelsea. Në këtë Botëror, ai vjen si zgjedhja e parë e stafit teknik për krahun e majtë të mbrojtjes.