web counter
LEXO PA REKLAMA!

SHKARKO APP

App Store
Google Play

E fundit!

x

Dëmtime dhe pezullime nga kartonët, “dhimbje koke” për Memellin në ndeshjen kundër Besëlidhjes

19 Tetor 2022, 19:18, Sport CNA

Dëmtime dhe pezullime nga kartonët, “dhimbje koke”

Skënderbeu do të kërkojë vijimësinë në kampionat dhe pas tri fitoreve radhazi duhet ruajtur i njëjti ritëm. Por duket se për korçarët nuk do të jetë aq e thjeshtë sa parashikohet të dielën në shtëpi, kundër Besëlidhjes së Lezhës.

Veç ecurisë pozitive dhe golave të shënuar nga sulmuesit që janë të dhënë në favor të bardhekuqve, trajneri Migen Memelli duhet t’i bëjë ballë këtij takimi pa një numër të madh titullarësh, që për arsye të ndryshme nuk do të jenë në këtë takim.

MUNGESAT- Gjithçka do të nisë me prapavijën, atje ku e sigurt duket mungesa e Dritmir Becit. Mbrojtësi shkodran i korçarëve ka pësuar një goditje të fortë në kavilje në ndeshjen ndaj Tomorit dhe për pasojë do të jetë jashtë për takimin e së dielës. Një mungesë e rëndësishme kjo duke parë se prej javësh, Memelli është duke luajtur me tre mbrojtës në qendër dhe tashmë duhet të kthejë sytë nga lojtarët e stolit, ku Kapllani, Hysolli dhe Zenunllari u aktivizuan në ndeshjen e Kupës. Me Becin si një mungesë e sigurt, mbrojtja ngrihet në alarm kur sheh se edhe Rapa ka pasur shqetësime.

Nëse për shkodranin rikuperimi është i pamundur, për mbrojtësin gjirokastrit shpresat që të jetë në fushë ndaj Besëlidhjes janë të mëdha, por që për momentin është jashtë grupit. Si të mos mjaftonin këto dy mungesa të rëndësishme, korçarët do të duhet që këtë javë të bëjnë edhe pa shërbimet e Dean Liços, një prej më të mirëve në mesfushën e Skënderbeut në këto javë të fundit. Liço pas ndëshkimit me kartonin e verdhë në Berat, ka plotësuar numrin e lejuar të kartonëve dhe do të duhet të ndjekë nga tribuna ndeshjen me lezhjanët. Mungesa të tilla rrisin vështirësinë e një takimi që në letër dukej më i thjeshtë. Tashmë në kampin bardhekuq ka filluar dhimbja e kokës rreth ndërtimit të formacionit titullar në takimin e së dielës, me shpresën e rikuperimit të Olti Rapës. Në të kundërt, problemet do të jenë të mëdha për trajnerin Memelli dhe për bardhekuqtë në këtë takim.





Lajmet e fundit nga