web counter
LEXO PA REKLAMA!

SHKARKO APP

App Store
Google Play

E fundit!

x

"Kishte menduar të më shantazhonte"/ Zbardhet dëshmia e Bill Gates për lidhjet me Jeffrey Epstein

24 Qershor 2026, 07:36, Kosova & Bota CNA

"Kishte menduar të më shantazhonte"/ Zbardhet dëshmia e

Janë publikuar detaje nga dëshmia që themeluesi i Microsoft, Bill Gates, dha më 10 qershor para Komisionit të Mbikëqyrjes së Dhomës së Përfaqësuesve të SHBA-së lidhur me marrëdhënien e tij me financierin e ndjerë dhe të dënuar për krime seksuale, Jeffrey Epstein.

Sipas dokumenteve të publikuara, Gates përmendi për herë të parë me emër dy gratë ruse me të cilat kishte pasur lidhje jashtëmartesore dhe deklaroi se Epstein kishte dijeni për këto marrëdhënie, duke u përpjekur t’i përdorte si mjet presioni ndaj tij.

Gjatë dëshmisë, Gates identifikoi dy gratë si Mila Antonova dhe Karima Nigamatulina. Ai tha se Epstein kishte informacion për këto marrëdhënie dhe se kishte tentuar ta shfrytëzonte atë për të ushtruar presion.

Në qendër të çështjes ndodhet një draft-email i datës 18 korrik 2013, i bërë publik nga Departamenti Amerikan i Drejtësisë. Emaili dyshohet se ishte hartuar nga vetë Epstein, ndoshta në emër të Boris Nikoliç, bashkëpunëtor i afërt i Gates dhe këshilltar shkencor në largim.

Në tekst përfshiheshin akuza se Gates kërkonte medikamente për të përballuar pasojat e marrëdhënieve seksuale me gra ruse, organizonte takime të fshehta me gra të martuara dhe përdorte substanca stimuluese.

Bill Gates e cilësoi përmbajtjen e emailit si një “tentativë shantazhi”, megjithëse sqaroi se nuk dihet nëse mesazhi u dërgua ndonjëherë apo mbeti vetëm në formë drafti. Sipas tij, dokumenti përmbante një kombinim faktesh reale dhe ekzagjerimesh, me qëllim forcimin e pozitës negociuese të personave të përfshirë.

“Epstein nuk më shantazhoi kurrë drejtpërdrejt, por duke parë këto email-e ekziston një mundësi serioze që ai ta ketë menduar një gjë të tillë”, deklaroi Gates.

Ai theksoi gjithashtu se nuk kishte dijeni për aktivitetet kriminale të Epstein gjatë periudhës kur kishin kontakte mes viteve 2011 dhe 2014, duke shtuar se takimet e tyre lidhen kryesisht me iniciativa filantropike dhe projekte bamirësie ndërkombëtare.

Ndërkohë, është publikuar edhe dëshmia e ish-asistentes së Epstein, Lesley Groff, e cila deklaroi se organizonte pothuajse çdo ditë takime për masazhe për shefin e saj, por këmbënguli se nuk kishte dijeni për aktivitete të paligjshme apo përfshirje të të miturve.

Groff e përshkroi Epstein si një njeri me “jetë të dyfishtë”, duke thënë se ai paraqitej si biznesmen i respektuar, ndërsa në realitet vepronte në mënyrë manipuluese dhe mashtruese.

Ajo zbuloi gjithashtu se kishte organizuar herë pas here biseda telefonike mes Epstein dhe Donald Trump, afërsisht një herë në tre muaj, por tha se nuk kishte informacion për arsyet pse komunikimi mes tyre u ndërpre më vonë. /CNA





Lajmet e fundit nga