Gazetari zbulon arsyen/ Pse efektivi që qëlloi Klodian Rashën s'kishte kamera

9 Dhjetor 2020, 22:17, Kronika CNA

Gazetari Eni Ferhati ka denoncuar dy probleme shqetësuese që ekzistojnë sot në mbarëvajtjen e Policisë së Shtetit duke iu referuar ngjarjes së fundit ku mbeti i vrarë Klodian Rasha. Ai tha se, punonjësit e policisë nuk kanë kujdes psikologjik ndërsa marrëveshja për funksionimin e kamerave të trupit nuk është rinovuar çka sjell dhe probleme. Kjo dyshohet se është edhe arsyeja pse efektivi i Shqiponjave që qëlloi mbi 25-vjeçarin Klodian Rasha nuk ka pasur kamerë trupi ditën e ngjarjes.

?Një problem që ka dalë në dritë është mungesa e trajtimit psikologjik të policisë pasi një trajtim të tillë kanë vetëm forcat speciale, forcat e ndërhyrjes së shpejtë dhe RENEA. Pjesa tjetër nuk kanë një trajtim psikologjik. Mos të harrojmë që janë shumë faktorë që ndikojnë në performancën e një efektivi policie. Këtë nuk e them për të marrë në mbrojtje efektivin e policisë?, deklaroi Ferhati në Euronews Albania.

Mungesa e kamerës së trupit gjatë shërbimit që po kryente efektivi i shqiponjave, ka shtuar pikëpyetjet për grupin hetimor pasi pamjet e filmuara mund të hidhnin më shumë dritë mbi ngjarjen fatkeqe ku humbi jetën 25-vjeçari Klodian Rasha.

Mësohet se shumica dërrmuese e kamerave të trupit nuk funksionojnë për shkak të difekteve. Nga 65 kamera që duhet të disponojë kjo njësi e posaçme më shumë se 40 prej tyre nuk janë në gjendje pune ndërsa riparimi i tyre nuk është kryer pasi sipas informacioneve ka përfunduar kontrata me kompaninë janë blerë.

Probleme me kamerat e trupit raportohen edhe në komisariate të tjera të kryeqytetit. Këto pajisje teknologjike u aplikuan për herë të parë në vitin 2016 me qëllim shmangen e akteve korruptive apo të abritraritetit nga ana e efektivëve.

Duke denoncua dhe ndryshimet e fundit në ligjin për Policinë e Shtetit, gazetari i Euronews Albania nënvizoi se ?z. Lleshaj i ka bërë me zell ndryshimet e fundit të ligjit për Policinë e Shtetit ku ministri i Brendshëm merr më shumë kompetenca? duke shtuar se brenda vetë mazhorancës ka pasur kundërshti duke i cilësuar ndryshimet si ?lajthitje?.

Për profilin e efektivit që qëlloi mbi 25-vjeçarin, Ferhati tha se policia e ka fshehur identitetin e tij ndërsa mediat nuk e kanë publikuar për shkak të etikës profesionale.

Efektivi 31-vjeçar kishte rreth 5 vite në strukturat e policisë së shtetit ndërsa prej afro 1 muaji është bërë pjesë e njësisë Shqiponja. Më herët ai ka shërbyer si patrullë në komisariatin nr. 5 në Kamëz. Efektivin po ashtu mësohet se banon me qira dhe është baba i një fëmije 3 muajsh. Ai pritet të dalë ditën e enjte para gjykatës së Tiranës për t’u njohur me masën e sigurisë.