Nga Edison Ypi/ Dua grua për mua

13 Janar 2018, 08:19, Aktualitet CNA

Dua grua të lartë. Por jo sa Nëmërçka që e hedh shurrën sa Vjosa dhe pordhën sa tundet Gjirokastra. Më mjafton sa Sonila Meço. Kam shkallë për tu ngjitur, por s’kam gomone ta hedh Drinin.
Dua grua të sofistikuar si Zhaku që të më pëshpërisi fjalë të bukura me liqer, nosit, Lasgush. Mirpo Zhaku ka ikur ka marrë burrë në vendin e vrasësve që e kanë përgjakur botën dy herë.
Dua grua që të ketë hiret e Anjeza Majës a të paktën të Monica Belluccit. Por kam frikë se po e putha e kafshoj, po e kafshova e gëlltis, po ta gëlltis vdes.
Dua grua që të jetë Femër sa Juliette Binoche. Ka të tilla. Por janë të çartallosura. Ta lënë dobiçin te dera.
Dua grua që t’i ketë flokët si të Catherine Zeta-Jones, sytë si të Angelina Jolie, buzët si të Claudia Lynx. Edhe mund ta gjej, por nuk e di në cilin katund kullot lopën.
Dua grua që të kem qef t’ja dëgjoj zërin. Si Vaçe Zela, Nexhmije Pagarusha, Billie Holiday, Joan Baez, Ornella Vanoni. Por dua ti dëgjoj njëherësh. Nuk i marr dot për grua të pesta.
Dua grua që të ketë zotnillikun e Nicole Kidman. Ah, kaq humanizëm nuk di si ta përdor me kaq shumë halabakë rretheqark.
Dua grua të ëmbël si Brigitte Bardot por kam frikë se duke e lëpirë sëmurem nga diabeti.
Dua grua hutonjëse, turbullonjëse, marramendëse, si Elisabet Taylor. Ka të tilla. Problemi është se po ju afrova më bie damllaja.
Dua grua të brishtë, të hajthme, elegante, fine, të tillë që kur të jetë lakuriq të duket më e mbushur se kur të jetë e veshur, pra si Audrey Hepburn. Të tilla ka vetëm nëpër libra dhe filma.
Dua grua që karakterin të mos ja vizatojë në fytyrë parukjerja por ta ketë të brendshëm, të thellë. Vështirë të gjesh femër të tillë. Ekziston vetëm Bruna Qeva të cilës arakterin jashtë e brenda ja ka gdhendur Perëndia. Mirpo Bruna është e martuar dhe tjetër si Bruna s’ka.
Dua grua ta ketë fiksim përndjekjen, internimet, burgosjet, torturat, vuajtjet e priftërinjve nëpër burgjet e kurvit, pra dua grua si Keda Kaceli. Mirpo tironcja Keda s’po kthehet nga Italia.
Dua grua me forma joshëse. Edhe sikur të kem 20 vjet pa parë femër me sy, jo si të Bleona Qerretit.
Dua grua të talentuar dhe eksentrike si Moza Ahmeti. Ku është zhdukur Moza ?
Dua grua me forma të mermerta si të shtatoreve antike, pra si Grida Duma. Shtatoreve u janë thyer gjymtyrët.
Dua grua acqua e sapone dhe superinteligjente si kolonjarja Anika Taçi. E kotë. Si Anika s’ka të dytë.
Dua grua që politikën me biznesin t’i lidhi më mirë se Berlusconi, pra dua grua si Keti Bazhdari. Jam vonë për këtë kombinacion.
Dua grua këshilluese, ndihmëse, bashkëpuntore, besnike, si Helena Kadareja e Hyut. Ah, shpresat janë zero.
Dua grua që të dijë të shkruaj si Desada Metaj, por para më dalin ca budallaqe.
Dua grua erudite, të qytetëruar, të butë, të flasi rrjedhshëm, të komunikojë ëmbël, si Ermira Mehmeti. Ermira Mehmeti është rastësi kozmike, kometë që kalon vetëm një herë dhe arratiset në qiellin e zi.
Dua grua ekzotike mesdhetare si Sophia Loren ose Gina Lollobrigita. Ka të tilla që kanë lindur në Myzeqe, Zadrimë, Mirditë, Devoll, Tropojë, Gjirokastër, Përmet, por kanë ikur në Itali Greqi, Angli.
Dua grua si Sheherazade të më rrëfejë çdo natë nga një përrallë që të mos dal kurrë nga ëndërra.