Zbulohet kalendari i Serisë A, mësoni kur luhen ndeshjet e mëdha

5 Qershor 2026, 19:34, Sport CNA

Është zbuluar kalendari i plotë i Serie A për sezonin 2026-2027, që do të nisë më 23 gusht dhe do të përfundojë në fundjavën e 29 dhe 30 majit 2027. Ekipet tashmë kanë një panoramë të qartë të rrugëtimit të tyre gjatë sezonit të ri, ndërsa vëmendja është përqendruar te sfidat më të rëndësishme dhe përballjet direkte mes skuadrave pretendente.

Java e parë do të luhet më 23 gusht dhe sjell disa përballje interesante. Interi, kampion në fuqi, do ta nisë sezonin në shtëpi kundër Monzës. Juventusi do të luajë në transfertë ndaj Frosinones, ndërsa Napoli do të përballet me Genoan.

Milani do të udhëtojë në Torino për t’u ndeshur me skuadrën granata. Roma do të luajë në “Olimpico” kundër Fiorentinës. Programi plotësohet me sfidat Atalanta-Sassuolo, Bologna-Lazio, Parma-Cagliari, Udinese-Como dhe Venezia-Lecce.

Në javën e dytë, të planifikuar për 30 gusht, Interi do të luajë në transfertë ndaj Cagliarit, Juventusi do të presë Parmën, Napoli do të luajë kundër Comos, ndërsa Milani do të përballet me Venezian.

Megjithatë, tifozët nuk do të duhet të presin shumë për sfidat e mëdha të sezonit. Java e tretë, e cila zhvillohet më 6 shtator, sjell dy ndeshje që pritet të tërheqin vëmendjen kryesore. Juventusi do të presë Milanin, ndërsa Interi do të përballet me Napolin në “San Siro”.

Muaji shtator rezervon edhe sfida të tjera të rëndësishme. Në javën e katërt, Lazio do të presë Milanin, ndërsa Juventusi do të luajë në transfertë ndaj Sassuolos. Një javë më vonë do të zhvillohet Roma-Inter dhe Juventus-Atalanta.

Edhe muaji tetor ofron përballje interesante. Në javën e shtatë, Juventusi do të luajë kundër Lazios, Milani do të presë Atalantën, ndërsa Bologna do të përballet me Interin. Në javën e tetë, Napoli do të luajë ndaj Romës, Interi kundër Fiorentinës dhe Udinese do të presë Milanin.

Një nga momentet më të rëndësishme të fazës së parë do të jetë java e dhjetë, e planifikuar për 1 nëntor 2026. Në këtë raund do të zhvillohen dy supersfida. Juventusi do të presë Napolin në stadiumin e tij, ndërsa në Milano do të luhet derbi i parë i sezonit mes Milanit dhe Interit. Këto dy përballje mund të kenë ndikim të drejtpërdrejtë në garën për kreun e renditjes.

Ndërkohë, një tjetër ndeshje e shumëpritur është derbi i Italisë mes Interit dhe Juventusit. Përballja e parë mes dy rivalëve historikë do të zhvillohet në javën e 19-të në “San Siro” dhe do të jetë ndeshja që mbyll fazën e parë të kampionatit.